Sabah Baku laka Ningani zana Manchester United 4-0 a an chak ṭumin, French rawlthar Leny Yoro chuan centre-back-ah bul a ṭan a; Lisandro Martinez pawhin Yoro chu club tlarhnung hmakhua atan mi pawimawh tak a nih thu a sawi chhuak a ni.

Pre-season chhung zawng leh season ṭan tir lam inkhelah te khan head coach Michael Carrick chuan Yoro hi right-back-ah a lo chhawr ṭhin a. He hmunah hian a che chhe lutuk lo na a, centre-back rilru pua a khelh ṭhin avangin a talbuai lek lek fo a, a tana khelhna hmun inhmeh tak a nih loh zia pawh a lang reng a nih kha. Carrick-a'n central defence lama a chhawr theih nan rawtna a awm reng bawk a, Sabah Baku nena an inkhelh chu he rawlthar tan hian a position duh bera theihna pholan theihna hunṭha a ni ta hlauh a ni.

Sabah Baku laka an inkhelh tir aṭang rengin Yoro hi a phili miah lo a, a inbengdai hle tih a hriat theih. Khingpuite nawrna hnuaiah pawh ball thunun thiamin, hma lamah ball a nawrpui ngam a, United-in tlarhnung aṭanga inkhel an thunun theih nan hmun rem a luah thiam hle bawk.

A thawhhlawkna hi tlarhnung venhim satliahah a tawp mai lo. Team-in hnuai lam aṭanga attack an buatsaih theih nan a pui a, a taksa chakna leh a chet dan pawh a phuailuai lo hle. Tlarhnungah a che kual thiamin, full-back te pui tura a rawn inrawlh thiam dan chu fakawm tak a tling a ni.

Inkhelh zawhah Lisandro Martinez chuan Yoro-a chet dan chu a fak hle a. Tlarhnung a venhim dan te, ball a hman thiam zia te, a phili loh dan leh khingpui mimal inhmachhawnna (one-v-one) a a buai miah loh dan chu a sawi lang bawk. The Peoples Person tarlan danin Martinez chuan Yoro hi club hmakhua a nih thu sawiin, a theihna sang ber a thlen theih nan squad pumpuiin an puih a ngai a ni a ti.

Pathiannia derby match khelh turah chuan Yoro hi bul a ṭan a la rinawm chiah loh na a, mahse Sabah Baku laka a chet ṭhat dan hian central defence-a Carrick-a player thlan theih turah ngaihtuahna thar a pe chiang hle. Hei hian a inhmeh vak loh right-back-a chhawr chhunzawm ai chuan centre-back-a chhawr tura an duh zawkna chu a tichiang hle bawk a ni.

He position-ah hian hun ṭha pek zui zel a nih a, hetiang theihna hi a pholang zui zel a nih chuan, Yoro hi United tlarhnung laili-ah player rinrawl tak a rawn ni chho thei dawn a ni. Harry Maguire-a hmun ruak zawi zawia a luah chhoh theih dan tur chu thil awm thei nia ngaih a ni a, mahse thutlukna nghet tak erawh a la ni rih lo thung.