Manchester United chu Europe inelna sang ber Champions League-ah an kir leh ta a, mahse an match hmasa bera Azerbaijan club Sabah an hmachhawn hunah head coach Michael Carrick chuan player pawimawh panga a chhawr thei dawn lo a, player dang pahnih dinhmun pawh a la chiang chiah lo bawk a ni.

Kum nga liam taa Spain rama Villarreal 2-0 a an hneh ṭuma United chu round of 16 thlenpuitu Carrick tan chuan, he inelnaa United manager nghet a nih hnua a match hmasaber a ni dawn a. Chutiang karah chuan mualneitu United hian hnehna chang turin an squad neih sa aṭanga an player langsar ṭhenkhat chhawr thei lovin an inbuatsaih a ngai dawn a ni.

Match hma chanchinbumite a kawmnaah Carrick chuan an player hliam neite chungchang a sawifiah a. Hun rei tak chawl tur zinga mi Manuel Ugarte chu World Cup-a a khup hliam na tak a tawrh avangin nakkum nipui ṭan hma chu a inlan thei dawn lo a ni. Defender Matthijs de Ligt pawh a la inlan thei dawn lo va, mahse he Dutch centre-back hian dam lam a pan chho mek thung.

De Ligt-a chungchang sawiin Carrick chuan, "A dinhmun kan la enkawl mek a, training a nei ṭha tawh hle a, a theihna zawng zawng a phawrh chho mek a ni. Mahse a dam chianna kawng tawp lam hi fimkhur taka kan enkawl a ngai a ni. Dinhmun ṭha takah a awm tawh a, squad-ah a rawn tel leh thei hi thil lawmawm tak a ni. A hma thei ang bera a rawn kir leh vat kan beisei," tiin a sawi.

Hemi rual hian goalkeeper Tom Heaton leh winger Amad Diallo te pawh an tihrawl (muscular) hliam vangin an chawl zui dawn a, engtikah nge an rawn kir theih ang tih erawh hriat chian theih a la ni lo.

Brighton aṭanga £70m senga an lakluh thar midfielder Carlos Baleba pawh pre-season laia a kerek a tihhliam avangin he match-ah hian a la inlan thei dawn lo bawk a ni. Tlarhnung lama player pawimawh Luke Shaw-a dinhmun pawh zawhna a la awm chhunzawm bawk.

Shaw hi tukin zinga training session-ah a inlan lo va, mahse hei hi chawlh hahdamna hun (recovery day) pek belh a nih vang a ni thung. Kar tawp hian Manchester derby-ah Manchester City an hmachhawn dawn bawk avangin, Sabah lakah hian Shaw hi a inlan dawn leh dawn loh chu match hnaih tawhah Carrick hian thutlukna a siam ang.

Shaw-a chungchang sawiin United boss chuan, "A taksa hahdam theih nan chawlhna hun kan pe belh mai a ni a, naktukah a dinhmun kan en leh ang. Thil thalo thleng emaw ruahmanna danglam a awm vang a ni lo. Mi tin hian dinhmun hrang hrang kan nei a, chu chu kan enkawl dan pangngai a ni," tiin a sawi.

Hliamin a tlakbuak ngun em em player dang Mason Mount pawh Everton nen 2-2 a an inhnehtawk ṭum khan bench-ah a ṭhu a, khelhtir erawh a ni lo. Sabah lakah hian inlan theihna hun a nei dawn em tih chu hriat a la ni lo va, mahse hliam dang a neih thar loh chuan matchday squad-ah chuan a tel ngei a beiseiawm a ni.