International break a zawh tak avangin kar tawp hian Manchester United Women chu khelmualah an kir leh dawn ta a. Pathianni tlai hian Red Devils hian London khawpui panin The Valley-ah Charlton Athletic Women chu khualmualah an hmachhawn ang.

He inkhelh hmachhawn tura an inbuatsaih meknain, Catalan coach Eva Olid chuan nimin khan chanchinbumite hmaah pre-match press conference a nei a ni. Olid chuan pre-season lai lailaa he hna chelh ṭan a nih bakah, coaching staff lamah inthlakthlengna a awm nual avangin bul ṭan a hautak hle tih a sawi chhuak a. Amaherawhchu, an match hmasa pahniha an tlawmna chuan amah leh team tan thil tam tak a zirtir thu a pawm bawk a ni.

Chelsea laka an tlawm hnua an inbiak dan sawiin Olid chuan, "Chelsea nena kan inkhelh zawh hnu khan tlang takin kan inbia a, he inbiakna hian rah ṭha chhuahin Arsenal laka kan khelh dan leh a hnu match dangah pawh danglamna a rawn thlen niin ka hria. Tunah chuan kan inpumkhatin kan inzawm nghet lehzual tawh hle a ni. Hemi awmzia chu ni ṭha hlir kan tawng reng dawn tihna a ni kher lo na a, mahse inhriatthiam tawnna ṭha zawk erawh kan nei ta a ni," tiin a sawi.

Olid chuan he international break chhung khan chawl hahdam miah lovin hun a hmang tih tarlangin, club hmakhua tur ngaihtuah nan he hun remchang hi a hmang zawk tih a tarlang. "Engkim remṭhat leh nan hun ka nei a, staff tharte mawhphurhna leh thawhhona ṭha zawk kan neih theih dan tur te ka buaipui a ni. He break hi ka tan chuan a hlu em em a, thil engkim ka remfel theih phah a ni. Tunah chuan bul ṭan thar leh ang mai kan ni a. Kan match hnuhnung bera kan boruak ṭha neih mek hi vawng nung zelin match lo awm turte thlengin chhawm luh kan duh a ni," tiin a sawi bawk.

Break chhung hian Olid hi Manchester-ah a awm reng a, hmasawn ngai laite chu a siamṭha mawlh mawlh a ni. A player-te ram tana an khelh dan pawh uluk takin a thlithlai reng a, an captain Maya Le Tissier-i'n ram tana a goal hmasa ber a khung chungchangah fiamthu an thawh dun thu pawh a tarlang lang bawk. "Hetiang thilah hi chuan fiamthu kan thawh reng zel a. A match khelh ve ve ka en thu leh khelmualah nuam a tih hmel hle tih ka hrilh a. Ani pawhin tlarhma lama han inrawlh chu nuam a tih thu min hrilh bawk. Chutiang inbiakna chu kan nei a, a hlim hle a ni. Player-te hi rilru hlim leh phur taka an lo kir leh hian a ṭha em em a, a chhan chu khelmuala che ṭha tur chuan hlim a ngai tlat a ni," tiin a sawi.

Chanchinbumite chuan Le Tissier hi striker-ah a chhawr zui dawn em tih fiamthu thawhin zawt mah se, Olid chuan a khelhna pangngaiah ngei chhawr a la thlan zawk thu a sawi thung. Player-te hi Zirtawpni chiah khan Carrington-ah an rawn kir khawm chauh avangin hliam nei an awm leh awm loh erawh a la chiang chiah lo tih a nemnghet bawk a ni.

Coaching team zawm thar Jose Herrera chungchang sawiin Olid chuan, "José nen hian football aṭanga inhria kan ni a. Rilru puthmang inang tak kan neih bakah tactics lamah hriatna thuk tak a nei a ni. Coaching staff-a tel zawng zawng hian thil thar eng emaw tal team-ah rawn thlen an mamawh vek a. Mize hrang leh theihna hrang nei kawp hi ka tan chuan a pawimawh em em a ni," a ti.

A tawp berah Charlton chungchang sawiin Olid chuan, "He international break hian thahrui thar tam tak a pe thei a. Game block thar ṭanna angah an ngai dawn a, an chak hmasak ber hmuh theihna hunṭhaah an ruat ngei ang. Chuvang chuan Pathianni hian theih tawp an chhuah dawn tih a chiang a, match harsa tak hmachhawn turin kan inpeih a ngai a ni. Kan khelh dan phung a inang lo maithei bawk a, inkhel hmuhnawm tak a nih ngei ka beisei," tiin a thlip ta a ni.