Manchester United chuan kumin nipui transfer bazar a khar danah beisei an pha meuh lo. Tun season-a Luke Shaw elpui thei tur left-back lakluh an tumna chu an puitlintir thei ta lo a ni. Bazar khar dawn darkar tlemteah Manchester City left-back Rayan Ait-Nouri chu lakluh tumin hma la mah se, an elpui lian City lamin a ngheta lakluh ngei ngei ngaihna (obligation to buy clause) an phut tlat avangin he inremna hi a ṭhulh zui ta a ni.
Hetiang a nih takah chuan United hian kum 2027 lamah left-back thar lakluh hi an ngaihtuah ṭha leh tura ngaih a ni a. January transfer bazar-ah pawh an ngaihven thei tho na a, tun hnai kumte enin Carrington lam hian thlasik transfer an bawhzui vak lo tlangpui a ni. United hian kumin chhungin player lak belh theihna la nei mah se, contract nei lo (free agent) chauh an lak theih dawn avangin, MEN Sport chuan tun season chanve hmasa atana United lineup chak ber tur a tarlang a ni.
Goalkeeper: Senne Lammens chuan Altay Bayindir a nawr chhuah aṭang khan United No. 1 goalkeeper dinhmun a chelh nghet hle a. Leeds United aṭanga a thlawna an lakluh Karl Darlow chu backup rintlak tak ni mah se, Lammens a inhliam a nih loh chuan FA Cup leh Carabao Cup-ah chauh a inlan a rinawm.
Defence: Diogo Dalot, Harry Maguire, Lisandro Martinez, Luke Shaw.
Right-back-ah Dalot leh Noussair Mazraoui te an inchuh mek a, tun dinhmunah chuan Dalot hi a khel ṭha deuh zawk. Lisandro Martinez chu Ipswich laka a rawn kir leh khan a che ṭha em em a, a ball pass dan khan team a phurchhuak hle a ni. Martinez-a kawppui tur erawh a la chiang chiah lo; Harry Maguire chu rintlak tak a nih rualin, Leny Yoro, Ayden Heaven leh hliam vanga la inlan thei lo £62.5m man Matthijs de Ligt te nen inelna a sang hle dawn a ni. Left-back-ah erawh senior player dang an neih loh avangin Luke Shaw-a dinhmun chu a nghet bur a ni.
Midfield: Carlos Baleba, Kobbie Mainoo, Bruno Fernandes.
Captain Bruno Fernandes-a hmun chu rinhlelh rual a ni lo a, ani tello chuan United dinhmun a chhe zual hle ang. Kobbie Mainoo pawh Ipswich lakah a khel ṭha hle a, World Cup-a a chet chhiat hnuah theihna phochhuah a tum hle tih a lang. A kawppui tur hian kumin nipuia an lakluh thar Andrey Santos, Youri Tielemans leh Carlos Baleba te zingah Baleba chu bul ṭan tura ngaih ber a ni a, Santos pawhin beiseina a nei sang hle. Mason Mount erawh pre-season-ah che ṭha viau mah se PSG laka a inhliam avangin a momentum a hloh leh rih thung.
Forwards: Bryan Mbeumo, Marcus Rashford, Benjamin Sesko.
Tlarhma veilamah Marcus Rashford chu Patrick Dorgu leh Matheus Cunha te lakah a chungnung zawk a, Ipswich laka a khelh dan ang kha a thehchhuak reng a nih chuan bul a ṭan ziah ang. Dinglam sirah kumin nipuia an lakluh thar Bryan Mbeumo chuan Amad a khum deuh zawk tura ngaih a ni a, tlarhma laili striker-ah Benjamin Sesko chu team mamawh ber target man a nih miau avangin bul a ṭan ngei a rinawm bawk a ni.
