Manchester United goalkeeper Senne Lammens chuan club tana a nih duh dan leh legendary keeper Edwin van der Sar-a mize neih ve a chak ber chungchang a sawichhuak ta.

Kum 2025 nipui lai khan Manchester United chuan inelna hrang hranga sang taka an inlan theih nan an goalkeeper dinhmun siamṭhat an mamawh hle tih a lang chiang a. Andre Onana leh Altay Bayindir te chu an chet dan a rualkhai tawk loh avangin goal vengtu rintlak tak an ni tawk lo a ni. Edwin van der Sar leh David de Gea te chuan Old Trafford-ah goalkeeper theihna tehfung an lo dah sang tawh hle a, anni dinhmun tlukpui tur chuan mi danglam bik nih a ngai reng a ni.

Khami nipui khan INEOS chuan Senne Lammens hi an lalut a, he Belgian keeper hian Van der Sar leh De Gea te dinhmun tluk pha tura theihna nei a nih zia a rawn pholang chho nghal a ni. Ball lo dan kawngah leh tlar hnung tihnghehna kawngah Lammens hian danglamna lian tak thlenin, United tlar hnung chu a ti thlamuangin boruak zangkhai leh inrintawkna a rawn thlen a. Kha season tawpah khan a chet ṭhat em avangin Premier League Transfer of the Season chawimawina hial a dawng ta a nih kha.

Mahse, tun season tharah erawh bul a ṭan ṭha lutuk lo thung a, league match thumah goal ruk ngawt a chhuah tawh a ni. Amaherawhchu hei hi a thiam loh vek a ni lo va, an tlar hnung venhimna a ṭhat tawk loh vang a ni ber zawk. Hetiang buaina tlem a tawk chung hian, he kum 24 mi goalkeeper hian a inrintawkna leh a tumruhna chu a hloh phah chuang lo.

Via Play nena an inkawmnaah, Lammens chuan United tana a nih tum dan leh United keeper ropui Van der Sar-a theihna a laksak duh ber chungchang a sawi chhuak a ni. Lammens chuan:

"Club lian chuan match khata che ṭha em em, a dawt leha che chhe leh mai goalkeeper an duh lo. Tlarhnung vengtute hnunga lungpui anga nghet, team-in rinchhan tlaka an neih theih mi an mamawh a ni.

"Chu chu ka tana thil tum lian ber a ni a, goalkeeper ka nih anga ka neih ngei ngei tur thil pawh a ni bawk. Edwin van der Sar-a dinhmun nen pawh a khaikhin theih mai thei. Ani hi ka ngaihsan em em mai a ni a, a khelh dan aṭanga ka laksak duh ber chu a phili miah lohna leh a inbengdaih theihna (calmness) hi a ni," tiin a sawi.

Tun hnaiah clean sheet an neih theih loh avangin sawiselna tlem awm ve bawk mah se, kum 24 mi Belgian shot-stopper hi a hmaa Onana leh Bayindir-te chet dan nena khaikhin chuan United tana hmasawnna ropui tak a ni chiang a ni. A la naupangin hma a la sawn chho zel a, a thil tihsual tlemte a siamṭhat chhoh zel theih chuan Man United tana keeper ropui berte zinga mi a rawn nih chhoh ngei beisei a ni. Tun hnaia Sabah FK laka clean sheet a neih theihna khan hma a sawn zel theih nan phurna thar a pek ngei pawh beisei a ni bawk.