Manchester United chuan Fans' Forum meeting an lo neih tawh minutes tichhuakin, stadium thar sakna tur chungchangah hriattirna thar an tichhuak ta.

Fans' Forum hi United ṭantu hrang hrang aiawhtute leh club thuneitu liante inkarah thil engkim tlang taka sawiho nana din a ni a. July thlaa an ṭhutkhawmnaa an sawiho nasat ber chu mi 100,000 lenna tur stadium thar sakna tur hmun leh ram leina chungchang a ni.

United hian stadium thar sak nana ram mamawh tam zawk chu thla hnih liam ta khan an lo lei fel tawh a. Mahse, he ram hi a tir lama stadium sakna tura an lo ruahman lawk nen khan a inang chiah lo tih tarlan a ni. Club thuchhuahah chuan a tira lemziahte kha rilrua suangtuahna (conceptual drawings) mai a la nih thu leh, tunah hian an thlan chhuah architect-te nen a tak taka lemziak duan hna an ṭan dawn chiah niin an tarlang.

Trafford Council chuan Old Trafford chhehvel tihhmasawnna tur masterplan an tlangzarh tawh thu sawiin United chuan: "Hei hi tuna Old Trafford awmna aṭanga hmar-thlang lam (north west) meter 350 vela hla a ni. Inkalpawhna kawng, luh zung zung theihna leh hmunhma ṭha neih kawnga masterplan nena inmil ber tur hmun kan thlang a ni. A tir lama lemziahte kha ngaihtuahna mai a la ni a, architect-te nen a tak tak ziah hna kan ṭan dawn chiah a, hemi rual hian fans-te ngaihdan lakna pawh kalpui zel a ni ang. Hmalakna awm zel chu ṭantute kan hriattir zel dawn a ni," tiin an tarlang.

Old Trafford ziarang vawn him chungchang sawi zelin United chuan, "Architect-te nena kan thawhdun chhung hian fans-te rawnna pawh ngawrh takin kan kalpui dawn a ni. Kan ngaih pawimawh ber tur chu Old Trafford rochun leh a ziarang hlun vawn him a ni ang. Munich Clock leh Trinity Statue ang chi hmuh theih thilte chu a awm ngei dawn a, chu bakah kan in tharah hian Manchester United stadium a nih zia hriat theihna ziarang zep tel kan duh a ni," an ti.

He inkhawmah hian fans lam chuan United-in an leiba $425m vel chu a rulhna tur sum dang hmanga lakthlak (refinancing) an tum nia thuthang awm chungchang leh ticket man a to phah ang em tih an zawt bawk. Club lam chuan ticket man a to lo ang tih an tiam thei mai lo a, mahse sum dinhmun nghet leh rintlak tak hnuaia kal an tum tlat thu an chhang thung.

United chuan, "Management anga kan mawhphurhna chu sum dinhmun nghet tak hnuaia inelna sang ber hmachhawn reng theih hi a ni. Stadium thar sak kan chak rualin, inelnaa sang taka kan din reng theihna tur zawnga kan kalpui a ngai a ni. Tualzawlah thutlukna dik tak siam zelin, leiba kan chelh theih rualin stadium thar sak leh nomawi tam thei ang ber chawi theihna dinhmuna awm reng kan tum tlat a ni. Sum lama harsatna awm chung pawhin tun hun chhung hian season ticket man tihpunna chu a tlem thei ang berin kan vawng hram hram a ni," tiin an sawi a ni.