Manchester United hi European Cup leh Champions League-ah vawi thum (1968, 1999 leh 2008) ngawt champion tawhin, final-ah vawi hnih an tlawm tawh bawk a, he inelna lianah hian sulhnu ropui tak an nei a ni. Mahse, hetiang khawpa chanchin ropui nei chung hian, Champions League khelmualah beisei loh taka tlawm leh mualpho ṭum engemaw zat an lo nei tawh bawk.
Tun hnai berah chuan 2023-24 season group stage-a Galatasaray laka Old Trafford-a 3-2 a an tlawm kha a theihnghilh mai mai tawh loh ang. Rasmus Hojlund-a'n goal hnih khung mah se, tlarhnung veilama Sofyan Amrabat an chhawr a ngai a, goalkeeper Andre Onana-a chet chhiat em avang leh a tihsual siamṭhat tumna lama Casemiro-a'n red card a hmuh tak avangin mahni mualah an tlawm a nih kha.
Kum 2021 khan Cristiano Ronaldo-a'n United a zawm leh hnua a Champions League match hmasaberah Ole Gunnar Solskjaer-a naute chuan Swiss club Young Boys an hmachhawn a. Ronaldo-a goal hmangin hma hruai mah se, Aaron Wan-Bissaka-a'n straight red card a hmuh hnuah an buai zui a, hun tawp dawnah substitute Jesse Lingard-a'n backpass a tihsual lian tak avangin Young Boys chuan an chakna goal an khung ta a ni.
Kum 2020-a Istanbul Basaksehir laka an tlawm ṭum phei kha chu United tlarhnung venhim dan mawlmang ber zinga chhiar a ni hial. United corner kick aṭanga tualchhung club lamin awlsam taka counter attack an neihnaah Demba Ba chuan goal a khung a, United player hlui Rafael da Silva khelhna Turkish club lakah hian an tlawm phah a ni.
2015-16 season khan Louis van Gaal-a hnuaiah group stage match hnuhnung berah Wolfsburg lakah 3-2 in an tlawm a, group stage aṭangin an tla zui bawk. Kha match-ah khan Van Gaal chuan Juan Mata aia Nick Powell a luhtir daih mai kha mak tih a hlawh hle a, season tawpah an ban zui ta nghe nghe a ni.
David Moyes-a enkawl lai 2013-14 season knockout match hmasaberah Olympiakos lakah khualmualah 2-0 ngawtin an lo tlawm tawh bawk a. He inkhelah hian goal zawnah vawi thum chiah an pet thei a, mahse Old Trafford-a second leg-ah Robin van Persie-a hat-trick hmangin an inpet tlang leh hram a nih kha.
Sir Alex Ferguson-a hun lai pawhin hetiang tlawmna hi an lo tawk ve tawh tho bawk. Romanian club CFR Cluj lakah Old Trafford-ah 1-0 in an tlawm a, group winners an nih chian tawh avangin player tam tak chawlhtir mah se, Wayne Rooney, Danny Welbeck leh Javier Hernandez te tlarhmaah an inlan tho a, shot 24 lai nei mah se an tlawm tho a ni.
Kum 2011 khan Champions League final an thlen hnu thla reiloteah, group stage paltlang turin point khat chiah mamawh mah se, FC Basel lakah 2-1 in an tlawm a, Ferguson-a hnuaia group stage-a an tlak vawi thumna a ni. Kum 2006 khan Copenhagen lakah Marcus Allback-a goal hmangin 1-0 in an lo tlawm tawh bawk a, Ronaldo, Rooney leh Solskjaer te an khelh vek chung pawhin an tlawm tho a ni.
