Old Trafford-ah Manchester United chuan Champions League match-ah Sabah chu 4-0 in an sawp a. He match-ah hian United academy graduate pahnih hnenah Champions League debut a pe thei chu head coach Michael Carrick-a'n "ka hlim takzet" tiin a sawi.
December 2023 hnu lama a vawikhat nan United hian Champions League match an khel leh a, first half-ah 3-0 ngawtin hma an hruai hman a ni. Hetiang taka hma an hruai hma thei hian Pathiannia tun season-a Manchester derby hmasaber an hmachhawn hmain Carrick-a chu player siksawi kualna hun remchang ṭha tak a siamsak a ni.
First half-ah Matheus Cunha, Bruno Fernandes leh Benjamin Sesko te chuan goal an khung a, second half-ah Lisandro Martinez-a'n goal lina a thun belh leh a ni. Hemi hnu hian Carrick-a chuan kum 19 mi rawlthar pahnih Harry Amass-a leh Shea Lacey-a te chu khelmualah luhtirin, he inelna sangah hian a vawikhatna atan an inlan ve ta a ni.
United academy-te laka Carrick-a'n rinna a nghah zia pholangtu thil thleng dang a ni a, he ni hian club tan chanchin lawmawm dang a thlen bawk. Leigh Sports Village-ah United Under-19 team-te chuan UEFA Youth League-ah Sabah Under-19 team-te chu 5-0 ngawtin an lo sawp ve bawk a ni.
Carrick-a chuan, "Harry leh Shay-a te khelmuala ka luhtir thei kha ka hlim takzet a ni. Hei hi thil pawimawh tak a ni a. Inkhel a kal chhoh zel lai khan rawlthar zawk khelmuala luhtir hi kan thil ngaihtuah ber a ni hrim hrim a, he football club tan hian chutiang tih chu a pawimawh em em a ni. An pahnih lakah hian ka lawm hle," tiin a sawi.
Amass-a hi Patrick Dorgu-a thlak turin a rawn lut a. Dorgu-a hian a vawikhatna atan left-back-ah bul a ṭan a, tlarhnung venhim lamah chetsual zeuh nei ṭhin mah se, an goal hmasa ber khungna tur ball a siamsak (assist) bakah hma lam nawrna lamah a che ṭha hle thung.
Carrick-a chuan Dorgu-a chungchang sawi chhunzawmin, "Pat-a kha a khel ṭha em em a ni. Zanin kan khelh danah khan mual sir lamah khan khingpuite tan hlauhawm tak a ni a, goal hmasa ber a siamsak bakah a hlauhawm thei hle. Pat-a chet danah pawh hian ka lawm takzet a ni," tiin a sawi belh bawk.
