Pathianni tlai hian Manchester United chuan Everton khelmual panin an inlan dawn a, an chet ṭhat chhunzawm zel an tum ang. Opening match-a kaisang thar Hull City laka 2-0 a an tlawm hnuah, kar kalta khan Michael Carrick-a naute hian an tlarhma theihna rawn pholangin 5-2 zetin Ipswich an sawp a, fan-te lawmna an thlen a ni. Everton mual hi khualmual tan luhchhuah a awlsam lo hle ṭhin a, mahse United hian Merseyside-a an zin hnuhnung vawi li (4)-ah tlawm an la nei lo a, February thla pawh khan Benjamin Sesko-a goal hmangin 1-0 in hnehna an lo chang tawh a ni.

Mahse, Hill Dickinson Stadium-a Everton an hmachhawn hunah hian United hian player pasarih (7) lai an chhawr thei lo maithei a, hliam buaina hian Carrick-a squad a la tibuai zel a ni. Tlarhma lamah Amad Diallo chuan training-ah muscle hliam a tawh avangin a inlan theih dawn leh dawn loh a la chiang lo a.

Nipui bazara £70m senga an lak thar Carlos Baleba pawh a kerek hliam aṭangin a la dam chiang lo a, Manuel Ugarte phei chu kum 2027 hma chuan a rawn kir theih a beiseiawm loh a ni. Kephah hliam vanga chawl Mason Mount erawh training-ah a rawn kir leh tawh thung a, Carrick chuan, "Mase hi team zingah a rawn tel leh tawh a, a ṭha hle mai. Tun kar khan a training thei a, chu chu kan tan thil lawmawm tak a ni," tiin a sawi.

Tlarhnung lamah pawh ngaihtuahawm tak an awm chhunzawm a; Matthijs de Ligt chuan a hnungzang hliam a la enkawl mek a, tun thla tawp hma chuan a khelh theih a rinawm loh. Luke Shaw pawh Ipswich an hneh ṭum khan minute 73-naah muscle hliam vang bawkin lakchhuah a ngai a, Everton lakah a inlan theih a la chiang lo bawk. Goalkeeper Tom Heaton pawh chhawr theih a la ni lo na a, Senne Lammens leh Karl Darlow te an awm avangin goalkeeper lamah erawh buaina a awm lo thung.

Shaw-a a inlan theih loh hlauh chuan Carrick hian left-back tana chhanna mak tak a nei thei hlauh thung a, chu chu Patrick Dorgu a ni. Kum 21 mi, Denmark international hi nikum khan Lecce aṭangin £25m-in an lalut a, a tirah chuan wing-back anga chhawr a ni ṭhin. Mahse January thlaa Carrick-a'n hna a chelh hnu khan tlarhma lamah sawn chhoh niin winger leh midfield-ah chhawr a ni chho ta a ni.

Tlarhnung indaih lohna karah hian Dorgu hi a khelhna ṭhin left-back-ah hian sawn kir leh a ni maithei a, Carrick pawhin a dam chhuak leh ta chu player thar lak ang hiala a ngaih thu a sawi chhuak a ni.

Carrick chuan, "Ani hi he hmunah hian a khel thei chiang alawm. A lo khel tawh ngei bawk a. Vanduaithlak takin hun eng emaw chen chu a inhliam a. Season liam ta khan kan tan vawi thum emaw vawi li emaw chauh a khel a, chuvang chuan ka tan chuan player thar ang mai a ni a, team tana a thawhhlawk em avangin kawng eng emaw takah chuan player lak thar (new signing) nen a inang hial a ni," tiin a sawi.

Carrick chuan sawi zawmin, "Denmark tan mual dinglam aṭangin a khel a, nipui lai khan tlarhma dinglam aṭangin goal mawi tak a khung bawk. Left-back-ah pawh a khel thei a, thil tam tak ti thei chi player a ni. Khel thei lo tura sawi ka ni lo hrim hrim. A theihna a nei a, kan la chhawr lo mai chauh a ni. A ṭul hunah chuan he hmunah hian kan chhawr mai thei a, buaina a awm lo reng reng. Training-ah pawh a ti fo ṭhin a ni. A la naupang a, theihna ṭha tak tak a nei bawk a, a theihna sang ber phawrh chhuahsak hi kan tum ber tur a ni," a ti bawk.