Manchester United head coach Michael Carrick chuan nipui transfer window khar a nih hnuah, a enkawl mek squad chu season liam ta aia chak leh nghet zawk a nih thu a sawi chhuak.

Kum 45 mi Carrick hian January thlaa interim head coach dinhmuna Old Trafford a zawm leh khan, Champions League khel tur dinhmuna inhlangkai chu thil theih loh tluk hiala ngaih a ni a. Mahse, United hi Premier League-ah pathumna nihpuiin Europe inelna sang ber khel turin a tlinpui a, 2025-26 season tawpah khan nghetin contract a ziak zui ta a ni.

Transfer bazar chhung khan United hian player hralh chhuah kawngah harsatna an tawk leh a, senior squad aṭanga an hralh chhuah lian ber chu Toby Collyer niin, Joshua Zirkzee erawh club-ah a cham chhunzawm thung. Player an hralh chhuah tlem chungchang zawhna chhangin Carrick chuan, "A ni maithei a, ni lo maithei bawk. Thil pawimawh ber chu squad tihchak leh tihngheh zual zel hi a ni.

"Thla riat liam ta chhung khan innghahna nghet leh ṭha tak kan nei a, group angin kan theihna leh tuina zawng kan inhrechiang tawk hle a ni. Squad chak zawk neih hi kan thil tum ber a ni a. Chumi ti thei tur chuan player chhuak an awm emaw, player cham zui an awm emaw pawh nise, hma sawn zel kan duh ber a ni. Kan ti thei ngei niin kan hria a, tun dinhmunah squad ṭha tak kan nei a, hma lam pan zel chu kan tih tur a ni," tiin a sawi.

Brazilian midfielder Casemiro-a chhuah hnuah, midfielder tharte'n a hmunruak an hnawhkhat thei dawn em tih chu thil hriat chakawm tak a ni a. Casemiro hi a theihna sang lai a liam tawh avangin a thlaktu lakluh hi thil pawimawh tak a ni reng a ni.

Kumin nipui bazarah club dangte sum chetdan enin, United neitu Ineos chuan sum hman kawngah fimkhurna an lantir a, club dangte sum phut san lutuknaah inhnukdawkin a tlo zawnga club enkawl an thlang zawk a ni.

Everton laka an inkhelh hmain Carrick chuan sawi belhin, "Inelnaah hian kan tlin tawk hle niin kan inhria a ni. Thil harsa lai ber chu team inpumkhatna (dynamics) leh balance dik tak neihho hi a ni. Squad chhungah midangte theihna chawisang thei tur player ṭha ber ber lakkhawm a, tawn hriat nei ṭha leh naupangte hmun dik taka chhawr thiam hi a pawimawh a ni. Sum hi thil lian tak ni mah se, a chhanna awmchhun a ni kher lo.

"Group ṭha ber thehchhuak tura hna thawh chu kan mawhphurhna a ni a. Hmun hrang hrang leh boruak khirh tak karah pawh tha taka khel a, hnehna chang thei squad ropui tak kan nei a ni. Season liam ta ai khan kan squad kan thuamchak zawk a, kan thlen theih chin turah beiseina sang tak kan nei a ni," tiin a sawi bawk.