Manchester United legend Ryan Giggs chuan rawlthar theihna sang tak JJ Gabriel chu first team-a khel thei tura inpeih sa a nih thu sawiin, Wayne Rooney nena an mize inanna a tarlang.

Giggs ngei pawh hi kum 17 a nih laia first team-a inlan ṭan niin, Red Devils tan hian match 963 ngawt a khel hman a. A vanglai khan mual veilam sirah khingpuite tana hmachhawn hrehawm ber leh khawvela left winger ṭha berte zinga mi a ni ṭhin. A theihna leh hlawhtlinna hian United academy ṭhat zia a pholang chiang hle a, academy hian kum tam tak chhung chu player ropui tak tak a lo chher chhuak tawh a ni.

Tunah hian United senior squad-a inlan ve thei mai tur rawlthar dang Gabriel chuan ngaihven a hlawh chho leh mek a, senior team training-ah pawh a inlan ziah tawh a ni. Kum 15 mi forward hian Under-18 team tana a chet ṭhat em avangin mi mit a la hle a, tun season chhung hian first-team debut a siam ngei beisei a ni bawk.

Rio Ferdinand nena an titi dunnaah, Giggs hian he rawlthar chungchang hi a sawichhuak a. Ferdinand-a'n Gabriel-a'n first-team training-ah Bruno Fernandes nena shooting drill an neih laia phili miah lova awlsam taka a awm theih dan a sawi laiin, Giggs chuan, "Kha kha chu Wayne-a mizia chiah a nih kha. 'Ball min pe rawh, ball min pe rawh' tih ang chi kha a ni a. Tu nge a khelhpui a, tu nena training nge an neih tih lam a ngaihtuah ve lo," tiin a sawi.

Wayne Rooney pawh kha kum 16 a nihin Everton senior team-ah a inlan ṭan a, kum hnih hnuah United chuan lalutin, club chanchina goal khung hnem ber (match 559-ah goal 253) niin Old Trafford legend a ni zui ta a ni.

Gabriel-a hmachhawp tur chungchang Giggs-a an zawh chuan, "Inkhelh tam a mamawh a ni. Match khelh a ngai a, first-team squad-ah i tel a nih chuan hnar thil a ni lova, mahse khelmualah minute tam zawk khelh theih a pawimawh. Mahse club ṭha berah a awm mek a, player naupang enkawl danah sulhnu ṭha tak an nei a ni. A kiangah hian club tana lo khel tawh mi ṭha tak tak - Michael Carrick, Darren Fletcher leh Jonny Evans te an awm a, an zingah academy chhuak pawh an awm bawk a, club dik takah a awm a ni," tiin a sawi.

Gabriel hi a ṭhanlen zel nan loan-a chhuahtir a ṭha em tih chungchangah Giggs chuan remti lovin, "Theihna bik nei (generational talent) a ni a, a cham zui a ngai a ni. Loan-a chhuah kha a ṭulna a awm lo, hmun ṭha berah a awm a, first-team bul hnaiah a awm reng zawk tur a ni. Match leh training chauh nilovin, team nena zinkawng zawh a, Manchester United laka mipui beiseina san zia leh an ngaihven nasat zia a hmuh thiam a ngai a ni.

"Chutiang boruak chu a zawm ziawng a ngai. Loan-ah chuan kum 19 emaw 20 emaw a nih hunah a kal chauh tur a ni a, hetiang a nih chhoh zel chuan first-team-ah regular takin a inlan chho thuai dawn a ni," a ti bawk.

Giggs chuan he rawlthar lakah hian dawhtheih a ngaih thu sawi mah se, senior team debut chu a hnaih tawh thu sawiin, "A chang chuan dawhtheih a ngai a. A chang phei chuan first team-a i telh loh theih miah loh hun a thleng ṭhin a ni. Thla khat hnuah emaw, thla ruk hnuah emaw, kum khat hnuah emaw a thleng mai thei. Mahse Michael-a'n thil a thlir dan a dang a, a zinkual mai mai aiin match khelh tam a mamawh zawk tih a hria a, chu tawnhriat chu a hlu em em a ni," tiin a sawi zui a ni.