Premier League season thara Manchester derby hmasa ber hmachhawn turin police lam an inbuatsaih mek a, Manchester United leh an ṭhenawm Manchester City inkhelh hmain Old Trafford kawt velah police chuan mihring hmel lo bihchiang thei (live facial recognition) camera an hmang dawn.

Pathianni (September 13) tlai dar 4:30 (BST)-ah hian United hian City hi Old Trafford-ah an mikhual dawn a ni. Greater Manchester Police (GMP) chuan he hmanraw thiamna thar hi police-te zawn lai (wanted) leh court thutlukna avanga inkhel en khapna tawk mekte hmuhchhuah nan ṭangkai takin an hmang dawn tih an tarlang a. He facial recognition technology hi season liam taa he derby match-ah hian an lo hmang tawh a, inkhel entute leh mipuite venhimna kawngah ṭangkai hle tura ngaih a ni.

He hmalakna hi derby match puala venhimna ruahmanna lian tak zinga mi a ni a, fan sing tam tak Old Trafford pan turte venhim nan police duty tam tak dah an ni ang. GMP chuan khelmual chhung leh pawn bakah, Manchester khawpui laili leh inkalpawhna lirthei (transport network) awmna zawng zawngah police an duty tir dawn tih a tarlang.

Police lam hian Manchester United thawhpuiin, stadium chhunga club safeguarding staff-te pui turin police safeguarding officer pahnih an dah belh bawk dawn a ni. Inkhelh chhung hian hmeichhia, hmeichhe naupang leh harsatna tawk thei zawkte chunga thil thleng duhawm lo a awm a nih chuan thuneitute hnena thlen thuai turin mipuite an chah bawk.

GMP Specialist Operations Unit aṭangin Chief Inspector Gareth Firth chuan, "Khawvel football huanga inelna lian berte zinga mi Manchester-a kan lo lawm leh thei tur hi kan nghakhlel hle a ni. He match hian khawvel hmun hrang hrang aṭangin ngaihven a hlawh em em a, kan hna ber chu he hun hi thlabar miah lova him tak leh mawhphurhna nei chunga mitinin an hman theih nan ruahmanna siam a ni," tiin a sawi.

Firth chuan sawi zawmin: "Ni lengin stadium-ah te, khawpui chhung hmun hrang hrang leh vantlang lirthei kawngpui awmna zawng zawngah police kan dah chhuak dawn a, kan thawhpuite nen ṭangkawpin mipuite himna kan ngaihtuah ang a, buaina a chhuah loh nan kan thawk ang. Hmeichhia leh hmeichhe naupangte laka tharum thawhna do kawngah hma kan la chhunzawm zel a, football hi mitin tana hmun nuam leh hahdam a nih theih nan kan ṭan dawn a ni.

"Fan-te hian inkhel hlim takin en se, an team-te thlawpin mawhphurhna nei takin chakna lawm se kan duh a ni. Tharum thawhna, buaina siam, inthliarna leh mi dangte rilru tihahdam lo zawnga khawsakna engmah kan enliam dawn lo a ni," tiin a sawi bawk.

GMP hian he venhimna hna hi club pahnihte bakah, Trafford council leh Transport for Greater Manchester te nena thawkhoin an kalpui dawn a ni.