Netherlands midfielder ropui Clarence Seedorf chuan a hun lai khan Manchester United zawm tura inbuatsaih tawh a nih thu leh, mahse Brazil striker ropui Ronaldo Nazario nena khelhdun theihna hunṭha a neih tak thut avangin a rilru a thlak ta zawk tih a puangzar.
He midfielder hlun hian a ram Netherlands leh a club khelhna hrang hrangah hlawhtlinna ropui tak tak a lo chang tawh ṭhin a; Ajax, Real Madrid leh AC Milan tan inlanin trophy lian tham 16 ngawt a lo chawi tawh a ni. England-a kal a, Manchester United tana inkhelh a tum lai hian Inter Milan-ah a lut ta zawk a nih kha.
Amazon Prime Video Sport YouTube channel-a United midfielder naupang Kobbie Mainoo nena inkawmna an neihnaah, kum 50 mi Seedorf hian he thu hi a sawichhuak a ni. Old Trafford-a khelh a lo chak tawh ṭhin zia sawiin, "Hun rei tak chhung chu he hmuna lo kal hi ka duh ṭhin a, helai hmuna khel ngei tur hi ka lo ni tawh a ni," tiin a sawi.
Young United midfielder Mainoo-a'n eng vanga Old Trafford pan ta lo nge a nih tiha a zawh hnuah, Seedorf chuan thil thleng dan chu heti hian a hrilhfiah a: "Manchester United pan ta lo chuan Inter Milan lamah ka kal ta zawk a ni. Marcello Lippi, Italy ram champion puitu coach kha i la hria em chu ka hre lo va.
"Ani chuan phone-in min rawn bia a. 'Clarence, Ronaldo R9 leh Christian Vieri te hnung chiaha rawn khelh hi i duh em?' a rawn ti a. Keichuan, 'Aw le, ka bungrua ka han siamfel ang e, ka lo kal nghal,' tiin ka chhang ta a ni. Italy kha keima tan pawh hriat bel zawk leh tlangnelna hmun a lo nih tawh avangin, khata kal zawk kha ka thlang ta a ni ang," tiin a sawi.
Khami hun lai vel khan Seedorf hi Real Madrid midfield-ah playmaker pawimawh tak a ni a, match 159 a khelhah goal 20 khungin midang pet luh tur vawi 35 lai a siamsak hman a ni. Los Blancos tan hian La Liga title, domestic cup pahnih leh Champions League nomawi a chawipui hman bawk.
Spain-a season thum a hman hnuah Serie A club Inter Milan chuan £20million (€24m) vel sengin an lalut ta a ni. Inter-ah hian nomawi lian tham chawi hman lo mah se, an elpui lian AC Milan a zawm hnuah erawh Italy ramah ropui takin hlawhtlinna a chang chhunzawm ta thung.
AC Milan tan match 432 zet inlanin, goal 62 a khung a, assist vawi 67 a nei bawk a, trophy pawimawh 9 lai a chawi nghe nghe a ni. Chung zingah chuan Champions League nomawi pahnih, UEFA Super Cup pahnih, Serie A title pahnih leh domestic cup pathumte a tel a ni.
AC Milan-ah kum 10 chhung zet hlawhtling taka hun a hman hnuin, Seedorf hian a career kharna atan Brazil club Botafogo a zawm a. A club hnuhnung ber hi league-ah champion puiin, kum 2014 khan football khelh a chawlhsan ta a ni.
