Manchester United chuan kumin nipui transfer window chhung khan Newcastle United defender Lewis Hall lakluh tumin hun tam tak an seng a. He England international hi Luke Shaw-a cho thei tur leh a hnu zela Shaw-a hmunruak luah thei tur atana an lak luh tum ber (priority target) a ni ṭhin. Amaherawhchu, Red Devils lam hi an chet a tlai deuh avangin hun takah official dawrna an thehlut hman ta lo a ni. Newcastle lamin an player langsar dangte an chan nual hnuah, Hall hi St James' Park-ah contract thar sei tak an ziahpui ta nge nge a, hei hian Manchester United chu khaw dang hawi a, target dang zawng turin a nawr ta a ni.
TEAMtalk-in a tarlan danin, Manchester United chuan Bournemouth left-back Adrien Truffert chu ngun takin an thlithlai chho mek a ni. United hian ni tlemte lo awm tur chhung hian left-back thar lakluh hi an thil ngaih pawimawh hmasak berah an dah dawn niin a lang a. Shaw-a thlaktu atan kum 24 mi France international Truffert hi an lak luh tum ber zinga mi leh an thlan hmasak ber a nih thu report chuan a tarlang a, "club lam pawhin he transfer tihpuitlin theih nan hian a bulṭhut an buatsaih ṭan tawh" niin an sawi bawk a ni.
Kum 24 mi Frenchman hi nipui liam ta mai khan Rennes aṭangin Cherries (Bournemouth) zawmtu a ni a, English football-ah a tlangnel chho nghal hle. Starting lineup-ah hmun nghet chang chho vatin, Premier League match zawng zawngah bul a ṭan kim vek a ni. Tunah hian Truffert-a man hi £60million vela chhiar a ni a, league match-ah goal paruk ngawtah a inrawlh (goal involvements) hman bawk. Truffert hi a tha a za ṭha em em a, thui tak ball tlankai pui (progressive carries) leh ball vawrh luh (cross) thiam tak a nihna chuan mi tam tak mit a la hle a ni.
Manchester United anga club lian khelmual panna hunṭha hi Truffert tan hnar a harsa hle tura ngaih a ni a, Old Trafford pan theihna kawng a inhawng a nih chuan he transfer hi a hreh lo hle nia hriat a ni. United lam pawh hian a hma zawng aia chiang zawkin he player an ngaihvenna hi an pholang a, "player lamin pan an chak tih an hriatchian tawk loh chuan hetiang em ema langsar hian club-in an ngaihvenna an tlangzarh ngai lo" tih a ni. Tunlai football kalphungah United anga club lian hian player rilru puthmang an hriat chian hma chuan hetiang hian an awm mai mai ngai meuh lo.
He France international hian Bournemouth nen hian kum 2030 thleng daih contract a la nei a ni. Hemi rual hian kumin nipui chhung khan Bournemouth midfielder Alex Scott pawhin United zawm hi a lo inhuam tawh hle a, mahse kum 2028 thlenga contract la nei a nih avangin Cherries hian an chelh lui thei hram a nih kha.
The Peoples Person thlirna aṭang chuan, United hian an tactics leh sum dinhmun thlirin Truffert hi an squad nena inmil tur tak a nih thu an tarlang a. Mahse, United hian left-back thar lakluh an duh ngei tih chiang viau mah se, Truffert-a chungchanga an ngaihvenna hi chanchinbu dangah a la darh zau loh bakah, he chanchin thehdarhtu TEAMtalk hi United chanchin tarlan dik loh ṭhin neih tawh avangin rintlak lutuk loha chhiar a ni a; chuvangin he indawrna hi a puitling ngei dawn em tih chu hunin a la hril ang.
