Old Trafford-a Manchester derby inkhel hmuhnawm takah, mi 10-a khel Manchester City chuan an hmelma lian Manchester United chu 1-0 in an hneh a. He inkhelah hian striker Erling Haaland chuan chakna goal a khung a, a goal khung chungchanga VAR thutlukna neih chu a ngaihdan a sawichhuak bawk a ni.

First-half chhung khan Phil Foden chuan United captain Bruno Fernandes-a laka a chet dan mawi loh avangin red card a hmu a, City hi khelmualah mi 10 chauhvin an khelh a ngai zui a ni. Mahse, darkar khat an khelh tlin ṭep (minute 60-na) ah City chuan hma an hruai ta zawk a, Josko Gvardiol-a cross per chu Haaland chuan mawi takin United goal-ah a lo pet lut ta a ni. A tirah chuan assistant referee-in offside tiin a lo vai a, mahse Stockley Park-a VAR official-te chuan uluk takin an enfiah a; hun rei fe an enlet hnuah Gvardiol-a'n ball a cross lai khan Haaland hi ball nen an in-line chiah tih an hmuchhuak ta a ni.

Hemi hnu hian tlar laili lama awm Enzo Fernandez-a dinhmun enfiah leh a ni a; ani hi offside position-ah lo awm mah se, ball a khawih miah loh avangin, VAR chuan offside hi sutin goal hi a pawm ta a ni.

Match zawhah Sky Sports-in an kawmnaah Haaland chuan a goal khung chungchang sawiin: "Tunge mawniin an lo khawih per hman a nih ka ring a. Mahse tuma'n an khawih lo tih ka hriat khan, offside anga min ngai chu ka la na (took it personally) hle a ni; a chhan chu kei chu ka offside zen zen ngai miah lo," tiin a sawi.

Norwegian striker chuan sawi zawmin, "Football match-a chak hi a nuam em em reng a, a bikin Old Trafford-ah minute 60 chhung zet mi 10 chauhva khel chunga chak phei chu a hlu lehzual a ni. Match tawpa kan fan-te lawm hmel leh an hlim hmel han hmuh phei kha chu thil ropui tak a ni," a ti bawk.

Injury time-ah City goalkeeper Gianluigi Donnarumma chuan Bryan Mbeumo-a goal thun tur ṭha takin a lo dansak a, hei hian City hnehna chu a humhim ta a ni. Replay aṭanga a lan danin Mbeumo hi offside maithei ni mah se, Donnarumma-a ball dan erawh a hlu takzet thung.

Haaland chuan an goalkeeper fak zuiin: "A tawp lamah Gianluigi Donnarumma khan a lo dang ṭha em em bawk a ni. Goal chhungah chuan chinghnia ang mai a ni a, a hmel pawh chinghnia a ang reng a ni. Mi kawlhsen tak a ni a, khatiang goalkeeper i hnunga a ding tih i hriat khan i rilru a thlamuang hliah hliah ṭhin," tiin a fak zui bawk a ni.