Nilaini zan Carabao Cup round thumnaa Old Trafford-a Brighton & Hove Albion mikhual tur Manchester United chuan hliam vanga chawl player engemaw zat an la nei a. Manchester derby-a Erling Haaland-a goal khung vanga City laka 1-0 a an tlawm hnuah, United hian he inelna hi an rilru an sawrbing a ngai tawh a ni.

Haaland-a goal khung pawm chungchangah hian Pro Ref chuan thutlukna dik lo (error of judgment) an siam palh tih pawm mah se, United erawh chuan tun season-a an Carabao Cup match hmasa ber atan an insiamrem a ngai ta thung. Head coach Michael Carrick chuan player pawimawh eng maw zat a la chhawr thei dawn lo a ni.

Manchester United player inhliamte dinhmun chu hetiang hi a ni:

Carlos Baleba:

Old Trafford a pan hmaa pre-season-a a kerek a tihhliam avangin Baleba hian United tan a vawikhatna atan a la inlan thei lo a. He midfielder chungchangah hian Carrick chuan thla hmasa khan, "A kerekah harsatna tlem a nei a, kar hnih emaw kar thum vel emaw a la ngai maithei a ni. Kan la thlir zel ang. A hma aṭanga kan hriat sa a nih avangin buaina lian a ni lo a, kan chhawr leh vat theih hunah chuan a lawmawm hle ang," tiin a sawi. September/October 2026 velah a rawn inlan theih beisei a ni.

Amad Diallo:

Pre-season laia a inhliam avangin Amad pawh tun season-ah a la inlan lo a. Ivory Coast international hi engtikah nge matchday squad-ah a rawn kir leh dawn tih chianna a la awm lo. Carrick chuan, "Tun karah chuan Amad hi a tel dawn lo a, a la chawl rei deuh rih ang," a ti.

Matthijs de Ligt:

Nikum November thla aṭanga a hnungzang hliam vanga la chawl De Ligt hi a dam ṭep tawh a, training a zawm leh tawh bawk. Mahse Carrick chuan matchday squad-a lakluh hmain fimkhur taka enkawl a nih thu a sawi. Carrick chuan, "Thil lawmawm a ni a, ṭha takin training a nei a, mahse fimkhur takin kan la enkawl rih a ni. Hun rei tak chhung i chawlh hnu hian a tawp thleng turin ṭan i la a, a tawp lam hi uluk taka enkawl a ngai ṭhin. Ke pen leh tur chuan a tawk chiah hriat a pawimawh a ni. Mahse kawng dik a zawh mek a, a dinhmun a ṭha e. Reiloteah a rawn inlan theih kan beisei," tiin a sawi a. October/November 2026 velah a rawn kir theih beisei a ni.

Luke Shaw:

Left-back Shaw hian a hliam chian loh avangin United match hnuhnung pahnih a hmaih tawh a. Carrick chuan, "Luke hi a la inpeih chiah lo na a, a inpeih ṭep tawh thung. A hliam hi a lian lo hle a ni," a ti a, September 2026 tawp lamah a kir theih beisei a ni.

Manuel Ugarte:

World Cup khelh laia a khup hliam na tak tuar Ugarte erawh thla engemaw zat a la chawlh a ngai dawn a, engtikah nge a rawn kir theih dawn tih hunbi chiah tarlan a la ni lo.

Goalkeeper Karl Darlow pawhin training-naah a hamstring a tihhliam avangin he goalkeeper tawn hriat ngah tak hi hun eng chen nge a chawlh dawn tih United lam hian an la puangzar rih lo a ni.