Manchester United chuan Premier League match li an khelh tawh aṭangin tlawm vawi hnih an tawng tawh a, table-ah 13-na dinhmunah an tla hniam mek a ni. Old Trafford-a season thara Manchester derby hmasa berah Michael Carrick-a naute hian Enzo Maresca-a enkawl Manchester City chu an lo mikhual a, first half-ah Phil Foden hnawhchhuah a nih avangin City hi mi 10-in an khel zui a ni.

Mi 10 chauhva khel City lakah United hi dinhmun ṭha zawka ding tura ngaih an nih laiin, second half-ah Erling Haaland chuan inhnialna chawk chhuak thei goal khungin, 1-0 in City hian hnehna an chang ta zawk a ni. He tlawmna avang hian Carrick leh a coaching staff-te tan inngaihtuah nawn a, ruahmanna thar siam a ngai leh dawn ta a ni.

Carrick-a hnuaiah hian United chuan Premier League match li an khelh tawhah goal pasarih khung tawh mah se, goal pasarih tho an chhuah ve bawk a ni. Premier League champion lai Arsenal erawh chuan match li an khelh aṭangin hma an hruai mek a, tun season chhungin goal khat chiah an la chhuah thung.

Sky Sports-a a sawinaah, United captain hlui leh legend Roy Keane chuan Carrick leh a thawhpuite chu tlarhnung buaina chingfel turin Arsenal khelh dan entawn turin a fuih a ni. Keane chuan, "Season liam taa an thil tih tawh chungchang chu kan sawi thei vek a, mahse tun hi season thar a ni a, bul an ṭan ṭha lo hle a ni," a ti.

Keane chuan sawi zawmin, "Anni leh an staff-te hian heng buainate hi an chinfel a ngai a, a bikin tlarhnung venhim lamah a ni. Tun dinhmuna entawntur ṭha ber chu Arsenal an ni a, a chhan chu an ṭha em em a ni. Chance an pe chhuak tlem a, clean sheet an nei hnem em em bawk," tiin a sawi.

Tun 2026-27 campaign chhung hian United chuan clean sheet vawikhat chiah an la nei a, chu pawh Ningani zana Old Trafford-a Sabah 4-0 ngawta an sawp ṭum kha a ni. Keane chuan game tinah goal tam zawk khung ringawta an tlarhnung ṭhat tawk lohna khuh bo an tum chu a fuh dawn loh thu a sawi bawk.

"Chu chu an thiltum tur a ni a, goal an chhuah reng a nih phawt chuan - vawiinah an tuar a, mahse match hmasa pawh kha ka sawi tel a ni - hei hian hma a sawntir thei lo ang che u. Hma lamah duh tawka ṭhain i che thei a, mahse game tinah goal khat emaw goal hnih emaw i chhuah reng a nih chuan, tlarhmaah eng anga ṭha pawh ni mah la, in tana buaina reh thei lo a ni reng tho ang. A chiang sa a ni," tiin Keane chuan a sawi belh a ni.

Mi 10 nena khel Man City laka 1-0 a an tlawm tak hnu hian, Red Devils hian Nilaini zan hian Old Trafford-ah Brighton mikhualin Carabao Cup third-round match an khel chhunzawm leh dawn a ni.