Premier League 2 inelna kal zelah, Zirtawpni zan khan Loughborough University Stadium-ah Manchester United Under-21 chuan 3-2 in Nottingham Forest an hneh lo.

Adam Lawrence-a enkawl United ṭhalai team hian season bul an ṭan ṭha em em a, Forest an hmachhawn hma hian league match thum an khelh tawhah hnehna an chang vek a, point khat mah hloh lovin an la kal a ni. Inelna hrang hrang an hmachhawn mekah hian a thui thei ang ber thlen chu an thiltum ber a nih laiin, Forest laka an tlawm tak avang hian harhchhuah nan an hman a ngai dawn ta a ni.

Inkhel ṭan tir aṭangin Nottingham Forest chuan United tana inkhelh tihharsa turin theih tawp an chhuah nghal a. United lam hian ball thunun tam zawk mah se, minute 20-naah Forest hian beisei loh takin goal an khung hmasa ta zawk a ni. United goalkeeper Bryne-Hughes chuan Forest forward ball pet chu hnai chet aṭangin lo dang per hman mah se, ball per chu an lo pet lut zui ta tho a ni.

Goal an chhuah hnuah pawh United an buai duh miah lo va, midfield-ah Jim Thwaites chuan ball pe kual zung zungin tlar hma lam a nawr chho pui zel a. First-half tawp dawn minute 45-naah, he match-a United tlarhma langsar ber Samuel Lusale chu penalty box chhungah Forest defender-in a tihtluk avangin referee chuan penalty a pe ta nge nge a. Penalty pet tur hian centre-back Daniel Armer a rawn pen chhuak a, ani hian chiang taka pet lutin chawlhlawk hmain 1-1 in an siphurh a rawn sut a ni.

Second half inṭan aṭanga minute 10 lekah, Lusale chuan United hma a hruaipui ta nge nge a. Premier League 2-a a vawi khat nan inlan ve thar Camacho-a ball pek ṭha tak aṭangin, veilam sir aṭanga rawn lalutin a ke dinglamin mawi takin a chhuih lut a ni. Hei hi Under-21 tana Lusale-a goal hmasa ber a ni a, United senior team hun hmasa lama an hman ṭhin counter-attack goal mawi tak a rawn entir a ni.

Mahse United hian an hmahruaina an humhim rei thei lo. Box chhungah Thwaites chuan Forest player a su thlu a, referee chuan penalty a pe leh ta a. Penalty hi pet nawn tir a nih hnuah Forest hian 2-2 in an rawn sut a, hemi hnu hian Forest chuan goal dang khung lehin 3-2 in hnehna an chang zui ta a ni.

Inkhelh tawp dawn minute 20 chiah a awm tawh tihin, United legendary player hlui Wayne Rooney-a fapa Kai Rooney chu Lusale thlakin an rawn luhtir a, U21 squad tana a debut match a khel ta bawk a ni. Thawhlehnia UEFA Youth League-a Atletico Madrid laka an tlawm ṭum pawh khan Rooney hi bench aṭangin a lo inlan tawh bawk a ni.

Forest hian mawi takin football khel lo mah se, an thawhrimna a hlawhtling a, United lakah point thum an hawn ta a ni.