Old Trafford-a Manchester United leh Manchester City inhmachhawn ṭuma mikhual lam Manchester City goal khung chungchangah thutlukna dik lo siam a nih thu referee enkawltu pawl chuan thuchhuah siamin an pawm ta.

He inkhelah hian Erling Haaland-a'n goal a khung laiin Enzo Fernandez chu offside dinhmun aṭangin inkhelhah a inrawlh (interfere) nia ngaih a ni a, mahse hei hi VAR lamin an lo ngaihthah palh hlauh a ni. Tunah chuan referee enkawltu pawl hian tihsual lian tak a awm tih an pawm ta vek a ni.

Tun hmaa PGMO tia hriat ṭhin, Pro Ref chuan Manchester United chu be pawpin tihsual an neih thu hi an hrilh nghal thu an tarlang.

Pro Ref aiawhtu chuan, "Pathiannia Old Trafford-a Premier League match-a Manchester United leh Manchester City inkhelh ṭuma minute 60-naa thil thleng chungchangah, Erling Haaland-a goal pawm a nih dan fiahna kan pe thei ang.

"Khelmuala referee thutlukna hmasaber chu Erling Haaland-a lakah offside tih a ni a, mahse chu chu VAR lamin enfiah lehin onside dinhmunah a ding tih hmuhchhuah a ni.

"He attack-ah vek hian Enzo Fernandez chuan ball a khawih lo tih finfiah a ni a, chuvang chuan offside dan bawhchhiatna chu ngaihdan (subjective) a zira thutlukna siam ngai a ni. Amaherawhchu, he thil thlengah hian VAR chuan a dinhmun khan nghawng a neih theih dan a hmu thiam ta lo a, referee chu khelmual sira screen-ah enfiah nawn tura (on-field review) hriattir zawk tur a ni a.

"Thutlukna dik lo kan siam a ni tih pawm chungin zanin hian Manchester United chu biakpawh an ni tawh a. He thil thleng chungchangah hian uluk zawka enfiahna (review) neih zui a ni bawk ang," tiin thuchhuah an siam a ni.

Referee hlui Mark Clattenburg pawhin he goal hi pawm tur a nih loh reng reng thu a lo sawi ve tawh bawk.

Mahse hetianga ngaihdam indilna leh tihsual pawmna hian Manchester United tan engmah awmzia a nei tawh lo thung. Inkhelh a zo tawh a, tlawmna an tuar fel der tawh a ni. City chuan point thum hlu tak an la a, Haaland-a goal khung hi team hnihte danglamna thlentu awmchhun a ni ta reng a ni.

Hetih rual hian United pawh thil thleng phenah hian an biru pumhlum thei bik chuang lo. Goal a luh theih chhan bulpui pakhat chu United lamin an penalty box chhung aṭanga ball an pet chhuah ṭhat tawk loh vang a ni a, chu chu City lamin remchangah lain goal thun theihna hun remchang an siam phah a ni.

Chu bakah, City lamin thil thleng dang vanga red card hmuin mi 10 chauhva hun tam zawk an khelh chung pawhin, United hian hlauhawm leh chance an insiam hnem tawk lo hle a ni. Mahse mipui leh chanchinbumite titi ber erawh referee lam tihsual lian lutuk leh rang taka an thiamloh an pawm zui tak mai hi a ni chho mek a ni.