Manchester United rawlthar theihna ngah tak, kum 15 mi JJ Gabriel-a'n Old Trafford chhuahsan a duh thu a darh chhuah hnuah, United head coach Michael Carrick chuan he naupang dinhmun chungchangah hian a vawikhatna atan a ngaihdan a sawichhuak ta.
Kumin nipui pre-season tour chhung khan Michael Carrick-a hnuaiah Gabriel hian United first-team tana a match hmasaber a lo khel tawh a, Stockholm-a Atletico Madrid laka 2-1 a an chak ṭum khan bench aṭangin a rawn inlan a nih kha. Kum 2021-a United youth academy zawmtu he forward naupang tak hi Premier League club tana beiseina nei sang berte zinga mi a ni a, mahse Thawhlehni khan Old Trafford chhuahsan a duh thu a rawn chhuah tak thut avangin United ṭantute rilru a ti buai hle a ni.
Gabriel hi kar liam ta tawp lam khan first-team squad te nena training nei tura beisei a nih laiin, a chhungte leh Manchester United hotute inkarah inremlohna leh boruak chhia a chhuak ta hlauh mai a. He thil thleng avang hian Nilainia Carabao Cup third-round-a Brighton an hmachhawn ṭuma senior team tana a competitive debut siam theihna hun ṭha a neih pawh a buai phah ta vek a ni. BBC Sport-in a tarlan danin, United thudawnnate chuan Brighton laka a khel lo a nih pawhin he rawlthar hian matchday squad-a tel theihna remchang ṭha tak a nei niin an lo ngai hman a ni.
A hma hun chungchang a buai chhoh tak mekah hian United manager Michael Carrick chuan Sky Sports hnenah thu sawiin: "Hemi chungchangah hi chuan kan fimkhur deuh a ngai a ni. Kum 15 mi naupang chauh a la ni a. Naupang a nihna angin JJ-a enkawl zui dan te, a ngaihsakna leh a himna lam hi a pawimawh ber a ni. Tlangval naupang tak chu a ni ngei mai, thil dinhmun chu a nihna ang ang hi a ni a, mahse mipui hmaa pholan leh sawi zui vak kawngah hian kan fimkhur a ngai takzet a ni," tiin a sawi.
'Kid Messi' tia an sawi hial ṭhin Gabriel hi United youth set-up ah hming chher chho mekin, manager hlui Ruben Amorim-a hnuaiah pawh khan first-team squad te nen an lo training dun tawh ṭhin a ni. Gabriel hi kumin October thla hian kum 16 a tling dawn chauh a, Manchester United hian a chhungte nena an inkar buaina hi an chinfel theih loh chuan, tun season tawpah hian Premier League club nena an contract a zo tawh dawn a ni.
Kar liam ta mai khan UEFA Youth League-ah a vawikhat nan inlanin, Leigh Sports Village-a Sabah 5-0 ngawta an sawp ṭum khan hat-trick mawi tak a khung a, a theihna sang tak chu a pholang nawn leh tawh bawk. Chelsea leh Arsenal academy-a lo awm tawh Gabriel hi khawvela club lian lian - Real Madrid, Barcelona, Paris Saint-Germain leh Bayern Munich te pawhin lakluh tumin an ngaihven ru reng tawh bawk a ni.
