Manchester United chu Nilaini zan Carabao Cup inkhelah Brighton lakah an che chhe hle a, goal hnih faia hma an hruai hnuah 3-2 in an tlawm a, inelna aṭangin an tla ta der mai. He inkhel hi derby match-a an tlawm hnu lawka thleng a nih bakah, team khelh dan a beidawnthlak em avangin Old Trafford mual chhungah Carrick-a naute hi mipuiin an au el (boo) zui hial a ni.

Tun season chhungin United hi an la khel ṭha tawk lo hle a, head coach Michael Carrick-a tan pawh pressure a sang chho tial tial a ni. Tun season inelna hrang hranga match ruk an khelh tawhah vawi hnih chiah hnehna an la chang a (Ipswich leh Sabah lakah chauh an chak), vawi thum ngawt an tlawm tawh thung a ni. Hetiang dinhmun chhe lutuk an tawn chhoh mek lai hian, United enkawl tura lo sawi rik tawh ṭhin manager chu Old Trafford directors' box-ah hmuh a ni ve leh khanglang bawk.

Simon Stone-a tarlan danin, United-in Carrick-a an ruat hmaa thlankawp tura an lo ngaihtuah tel tawh Kieran McKenna chu Brighton nena an inkhelh lai khan directors' box-ah hmuh a ni a. McKenna-a rawn inlan hian thuthang a chawk tho nghal chuai a, Ineos chuan Ole Gunnar Solskjaer-a assistant hlui hi Carrick-a thlaktu tur atan an thlir mek em ni tih zawhna a chhuah phah a ni.

McKenna hi United nen hian vawi tam tak sawizawm a lo ni tawh ṭhin a, fan tam tak pawhin club head coach la ni thei tura an beisei lian tak a ni. McKenna hi Carrick-a thlawp tura mual chhunga lo kal mai pawh a ni thei a, mahse Ipswich Town boss hlui hetiang hun buai laia a rawn inlan kher hian mi titi a ti tam hle a ni. Ani hi rawlthar theihna sang tak nei, nakina club lian enkawl ngei tura ngaih manager zinga mi a ni.

United hian manager thlak an tum a nih chuan, McKenna hi an ruahmanna hmawr bawkna tura mi remchang ber a ni thei dawn a ni. A chhan chu tun dinhmunah season laili laiah chhawr theihin a awm a, chu bakah club chhungril a hrechiang em em a, United academy enkawlin first-team coaching staff-ah pawh a lo tel tawh ṭhin a ni.

Chuvang chuan Pathianni hian Carrick-a naute hian Fulham lakah hnehna an chan ngei ngei a ngai tawh dawn a ni. Fulham an hmachhawn hnu hian chawlhkar thum zet (three-week break) an chawl dawn a, tlawm leh a nih vaih chuan Carrick-a chungah hian ban theihna thleng khawpin nawrna a lian hle ang. United-in manager thlak an tum a nih ngat chuan, he chawlh chhung hi thutlukna siam nana hun ṭha ber tur a ni a, chuvang chuan Carrick-a tan tlawm nawn leh chu a thiang tawh lo hrim hrim a ni.

Thil a ṭhat chhoh thuai loh chuan Michael Carrick-a hun hi Old Trafford-ah a tawi tawh hle maithei a ni.