Manchester United rawlthar theihna ngah tak JJ Gabriel-a'n Old Trafford chhuahsan a duh thu a rik chhuah hnuah, head coach Michael Carrick chuan "dinhmun chu a nih dan ang ang a ni mai" tiin a sawichhuak.

Thawhlehni khan kum 15 mi Gabriel hian club chhuahsan a duh thu a sawi chhuak tih hriat a ni a. Carabao Cup third round-ah hian Gabriel hi United chanchina debut siam thei naupang ber ni tura beisei a nih laiin, club chhuahsan a duh tih hriat a nih tak hnuah he ruahmanna hi ṭhulh a ni ta a ni.

United lam chuan thla thar October ni 6-a kum 16 a tlin rual hian Gabriel hian an club a chhuahsan mai an hlauthawng hle. Gabriel hian ram pawn (overseas) club pan nan a Irish passport a hmang thei dawn a, hei hian UK player-te venhimna dan awmsa chu a paltlang theih dawn avangin United hian chhuak lo tura dang thei lo mai turah an inngai a ni.

Carabao Cup-ah Brighton laka 3-2 a an tlawm hnuah Carrick chuan he rawlthar chungchang hi sawiin, "He thilah hian kan fimkhur a ngai deuh a ni. Kum 15 mi chauh a la ni a. Naupang a nih anga a himna, a enkawlna leh a ngaihsakna lam hi a pawimawh zawk a ni," tiin Sky Sports a hrilh. Carrick chuan sawi zawmin, "Tlangval naupang tak chu a ni chiang mai. Dinhmun chu a nih dan ang ang hi a ni mai a, mahse thuthang leh boruak lian lutuk awm theiah hian kan fimkhur a ngai a ni," a ti.

Brighton laka an tlawm ṭum hian rawlthar dang Shea Lacey chu hunṭha pek a ni ve thung a. Kum 19 mi Lacey hian United senior team tana a competitive goal hmasaber chu ke veilam hmangin mawi takin a khung a, Mason Mount-a'n goal hnihna rawn thun belh bawk mah se, United chuan Carabao Cup round dawt leh an thleng zo ta lo a ni.

Chuti chung chuan Lacey-a khelh danah Carrick chu a lawm hle thung a. "Game bul ṭantu player naupang zawk a nihna angin Shea-a lakah hian beisei tur dang a awm chuang lo. Hei hi a thiam zawng tak a ni a, age group hrang hranga a lo khelh chhoh tawhna zawng zawngah pawh hetiang hi a lo ti tawh ṭhin reng a ni," tiin Carrick chuan a sawi.

Head coach chuan sawi chhunzawmin, "Vawi tam tak ka lo hmu tawh ṭhin a, chuvang chuan stage lian zawkah rawn inlan a, hetiang a rawn ti thei hi a lawmawm hle a ni. Inkhelh laihawla hun duhawm tak a nih bakah, tlangpui thuin a khel ṭha hle bawk. A zan hun hmanah hian a lungawi thei ang. A tan chuan zan ropui tak a ni a, a khelh ṭhat bakah goal a khung thei hi a tan hmasawnna lian tak a ni," tiin a fak zui bawk a ni.