Manchester United manager Michael Carrick chuan Elland Road-a Leeds United hmachhawn turin an inbuatsaih mek laiin, squad dinhmun leh player hliam hrang hrangte chungchang Carrington training complex-a press conference-ah a sawi fiah a ni.
Red Devils manager kum 45 mi hian August thlaa 5-2 a Ipswich Town an hneh hnu khan Premier League-ah hnehna an la chang leh miah lo a. United hi tun season Premier League-ah match hmasaber paruk khelh tawhah vawikhat chiah la chakin, vawithum an inhnehtawk a, vawihnih tlawmin point 6 nen 13-na dinhmunah an ding mek a ni.
Elland Road-a Leeds United hmachhawn tur hian United chuan tlar laili leh tlar hnungah hliam buaina an nei nual a, player pawimawh engemaw zat inlan thei lo tur an nei a ni.
Kobbie Mainoo leh Luke Shaw te dinhmun :
Kum 21 mi midfielder Kobbie Mainoo hi Tottenham nen Old Trafford-a 1-1 a an inhnehtawk ṭum khan hliam a tawh avangin, Spain rama Atletico Madrid hmachhawn tura United zin chhuahnaah a tel ve thei lo a. Left-back kum 31 mi Luke Shaw pawh hliam bawk avangin Atletico hmachhawn tura zin chhuak zingah hian a tel ve lo bawk. Heng player pahnih hi Leeds hmachhawn turin an inpeih hman dawn em tih zawhna chhangin Carrick chuan, "Luke leh Kobbie te dinhmun hi kan la ngaichang rih ang," tiin a sawi.
Benjamin Sesko leh Noussair Mazraoui :
Striker Benjamin Sesko pawh a shin problem buaina avangin Spurs leh Atletico Madrid match-ah te a inlan thei lo a, Slovenia tan pawh October international break khan a khel thei lo a ni. Carrick chuan, "Ben-a hi fiahna (checks) hmachhawn zui mekin, a chawlh hun chhung tur chiang zawka sawi hmain a dinhmun kan enfiah mek a ni," tiin a sawi bawk.
Chutih rualin Moroccan defender Noussair Mazraoui pawh thla liam taa Africa Cup of Nations qualifiers-a Lesotho nena an inkhelh ṭuma a hliam tawh avangin Tottenham leh Atletico match-ah a inlan thei lo bawk a ni.
Player inlan thei lo hmabak rei turte :
Heng bakah hian Carrick-a squad hian hun engemaw zat chhung player pathum an chhawr thei dawn rih lo bawk :
1. Patrick Dorgu: Kum 21 mi Denmark international left-back hi October break-a Wales nena Nations League an khelh ṭum khan a chawn (hamstring) a ti hliam a, chawlhkar engemaw zat a chawlh a ngai dawn tih Carrick-a'n a nemnghet sa tawh a ni.
2. Tom Heaton: Kum 40 mi goalkeeper veteran hian August thlaa Ullevi Stadium-a PSG nena 1-1 a an inhnehtawk ṭum khan a chawn (hamstring) a ti hliam a, a la inlan thei lo chhunzawm zel a ni.
3. Manuel Ugarte: Kum 25 mi Uruguay midfielder hi kumin nipui World Cup campaign-a ram tana a khelh ṭuma a khup hliam (ACL) vangin zai a ni a, kum 2027-ah chauh United tana inlan leh tura beisei a ni.
