Pathianni hian Michael Carrick chuan Manchester United enkawltu hna a chelh aṭanga thla riat tlinna a lawm dawn a, hemi ni hian a ngheta he hna a chelh theih nana kawng hawngtu match pawimawh tak City nena inhmachhawnna bawk chu a tawk leh dawn a ni.

January ni 13 khan Carrick hi Old Trafford-ah hun reilote chhung atan lailawk (interim) manager anga ruat a ni a. Mahse, ni nga hnu leka mahni mualah Manchester City lakah 2-0 a hnehna an chan khan a dinhmun chu a ngheta pawhsei theih a nih zia a rawn pho chhuak ṭan a nih kha. Season tawpah United chu pathumna nihpuiin Champions League-a an kir leh theih nan a hruai a, kum hnih daih contract ziahpui zui a ni. Kum 45 mi Carrick erawh chuan City hmachhawn tura a inpuahchah ṭan tirh aṭanga vawiin thleng hian a hna thawh dan leh a rilru puthmang chu engmah a la danglam loh thu a sawi.

Championship club Middlesbrough lo enkawl tawh Carrick-a'n United head coach nghet nihna a chelh theih hi a tirah chuan rin a hlawh lo hle a, mahse result ṭha a rawn neih chhoh takah chuan thil a inthlak danglam ta a ni. Football khawvelah thil a inthlak chak zia a hriat chian tluk zetin, bench-a a ṭhutna chu engtik hunah pawh a tawp thei tih hre reng chungin club hmakhua atan hun rei daih tur ruahmanna a siam zui zel thung.

Hemi chungchang hi sawichhuakin Carrick chuan, "A tir lam aṭang khan ka sawi tawh ṭhin a, ka ruahmanna zawng zawng leh thutlukna kan siam tawhte chu hun rei tak chhung heta kan awm dawn anga ngaihtuahna hmanga siam vek a ni. Engtia rei nge ka awm dawn tih ka hre ngai lo a, tun thleng pawhin ka la hre chuang lo!" tiin a sawi.

"Mahse, a tir ni khatna aṭang khan hmalam hunah eng ang nge kan nih duh a, khawi lam nge kan pan duh tih hi kan ruahman reng ṭhin. Thil a thleng zung zung a, inthlakthlengna a lian hle bawk a, dawt sawi loh chuan kha match kha kan tan chuan thil hriat lawk theih loh boruak a nih kha. Chutiang karah pawh kan naute khelh dan kha a ropui em em a ni. Mahse, a tir aṭang khan he club hi hun rei tak atana kan duhna hmun kan thlenpui theih nan ruahmanna fel tak siam chu ka thil tum a ni char char a, chutiang chuan ka kalpui zel bawk ang," tiin a sawi bawk.

January thlaa 2-0 a United-in hnehna an chan ṭum khan Bryan Mbeumo leh Patrick Dorgu ten goal an khung a, an phu hle bawk. Kar khat a liam hnuah Emirates Stadium-ah Arsenal an hneh zui leh bawk a ni. Mahse, khami hnu aṭang khan thil tam tak a inthlak tawh a, Etihad lamah Pep Guardiola thlakin Enzo Maresca a ṭhu tawh a, chuvangin Carrick pawhin a vawihnihna atana Manchester derby a hmachhawn tur chu a hmasa zawk nen a inang dawn lo tih a hre chiang hle a ni.

Carrick chuan sawi zawmin, "Inkhel pahnih inang chiah a awm ngai loh avangin a danglam ngei dawn a ni. Nikumah kan hneh tawh avang ngawtin, chutiang chiah chuan thil kan ti leh ang a, engkim a ngai reng ang tih ngaihdan neih ngawt chi a ni lo," a ti.

"A tirah kha chuan beiseina boruak a thar a, engkim mai kha a thar em em a, khawi lam nge kan pan dawn tih pawh hriat a har a ni. Player-te, keimah ngei pawh, coach-te leh nangni chanchinbumite thlengin engtin nge thil a kal zel dawn tih in lo thlir ṭheuh a, inthlakthlengna kha a rang hle bawk a ni. Hun kal zelah inrintawkna kan lo neih chhoh tawh leh, kan ṭha chho zel a ni tih kan inhriatna hian nasa takin min pui a ni. Match lian tak leh pawimawh tak a ni tih kan hria a, nghawng lian tak a nei dawn tih pawh hai rual a ni lo, mahse kan nghakhlel hle. Inpuahchah leh inenkawl dam nan hun a tlem hle a, mahse kan hun neih ang chhun chu a ṭha thei ang berin kan hmang dawn a ni," tiin a sawi zui bawk.