Manchester derby boruak lum tak hnuaiah Manchester United chuan City lakah 1-0 a tlawmna an tawh hnuah, referee Michael Oliver leh VAR team thutlukna siam chu khelmual pawn lam thlengin sawi hlawh ber a ni chho mek a ni.
He inkhelah hian City player Phil Foden chuan red card hmuin hnawhchhuah a ni a, Bruno Fernandes erawhin yellow card a pumpelh thung. Mahse City chakna goal khungtu Erling Haaland-a goal erawh dan leh hrai kalhin offside chiang tak nia ngaih a nih laiin referee te chuan an pawmsak ta tho a ni. Referee hlui Mark Clattenburg pawhin Enzo Fernandez chu offside dinhmunah awmin ball a chang lo chungin inkhel a tibuai (interfering with play) ngei niin a tarlang a ni.
Inkhelh zawhah United defender Lisandro Martinez chuan City goal pawmsak a ni chu a lawm loh thu a sawi chhuak a, head coach Michael Carrick pawhin he thutlukna hi a hrethiam lo hle. Carrick chuan, "Ka thu dawn dan chuan ani khan inkhelh a tibuai lo an ti a ni awm e. Keichuan ka hrethiam thlawt lo a ni.
"Referee-te'n thutlukna dik an siam theih nan ṭanpui kan tum ṭhin a, mahse dante hi hetiang zawng hian em ni an lo hrilhfiah ṭhin? Chu mai bakah, line an rin dan pawh kha rinhlelhawm tak a ni. Match official-te'n inkhelh hetiang zawnga an thlir a nih chuan thil ngaihtuahawm tak a ni," tiin a lungawilohna a phawrh chhuak a ni.
VAR thutlukna hi a dik lo ngei a, chhanna fiah tak an mamawh meuh mai. Mahse minute 96 chhung inkhelh chhung zawng thlirin, Carrick-a hian insawithiamna tur hmun a nei lo; a chhan chu a naute hian VAR thutlukna awm emaw awm lo emaw, match chhuahpui khawp theihna an pholang lo hrim hrim a ni.
City lamin mi 10 chauh an khelhpui hnuah pawh United khelh dan chu a ṭha lo tial tial zawk emaw tih mai tur a ni a, mihring tam zawk an nihna pawh remchangah an hmang ṭangkai thei lo. Minute tawp dawna Bryan Mbeumo-a'n goalkeeper nen chauh an inhmachhawn (one-on-one) ṭuma a thelh bak chu hlauhawm tham an siam meuh lo. An chance neih dangte pawh Marcus Rashford leh Kobbie Mainoo ten penalty box pawn aṭanga an pet, goal ban per ve ve chauh kha a ni.
United buaina hi thil thar a ni lova, tlarhnung tlemte nghata veng nghet (low-block) team-te ṭhiah theih loh hi an lo buaipui tawh ṭhin a ni. Hetiang buaina chingfel thei tur player ṭha Carrick hian nei reng mah se, an khelh dan phungah danglamna a la thlen meuh lo. Opta leh xG Philosophy tarlan danin, minute 7-na aṭanga 95-na inkarah United hian target zawnah expected goals (xG) 0.04 chauh an nei a, hei hi player 10 chauh khelhpui City lakah chuan pawmzam harsa tak a tling a ni.
Mahni mualah mi 10 khelhpui laka 1-0 a tlawm hi United tan thil thar a ni lo. Season liam ta November thla khan Ruben Amorim-a hnuaiah mi 10 khelhpui Everton lakah 1-0 bawkin an lo tlawm tawh a, kha kha manager a chhuah theihna tura an tlakchhiat ṭanna a nih kha.
Tun dinhmunah chuan chutiang thleng la ni lo mah se, hei hi Carrick-a tan hun pawimawh leh innghahna lian tak a ni tawh a. An khelh dan phung siamṭhain he buaina hi a chingfel a nih loh chuan, tun season boruak hian zual lam a pan chak viau thei a ni. United ṭantute zawng zawngin Carrick-a hlawhtlin an duhsak vek laiin, season ṭan dan duhawm loh tak hian beiseina a timit hle. Kar thar lo thleng tur hi Carrick-a tan a pawimawh hle dawn a, chawlhkar thum chhung chawlh an neih hmaa a hma hun sawi neuh neuh pumpelh tur chuan match hnih lo awm turah hian hnehna an chan ngei a ngai tawh dawn a ni.
