Manchester United tan chuan buaina pakhat a zawh rualin a dang a rawn thleng zut a ni ber mai. Club neitu Glazer chhungkua leh Sir Jim Ratcliffe laka fan-te lungawilohna lantir a nih bakah, Pathianni khan Manchester derby-ah an tlawm zui a, tunah an academy rawlthar theihna ngah berte zinga mi JJ Gabriel chuan club chhuahsan a ngen leh ta bawk.

Kum 15 mi JJ Gabriel hi khawvel hmaah theihna sang tak nei, engkim hmachhawn thei tura ngaih a ni a. Mahse The Specials hla 'Too Much Too Young' tih ang deuh khan, a la naupan lai aṭangin boruak rit tak a hmachhawn mek a ni. Gabriel-a'n club chhuahsan a duhna chhan bulpui ber chu a pa Joe O'Cearuill-a thununna leh ngaihdan dik lo aṭanga lo chhuak niin an hria a, he rawltharin a lo khelhpui tawh ṭhin London club hrang hrangte pawh chuan a pa mizia hi mak an ti hran lo a ni.

Gabriel-a'n United nena scholarship inremna an neih chu tihtawp a ngen tih thu a darh rual chiah hian, United legend Wayne Rooney chuan a Facebook page-ah chet dan mak tak a rawn lantir a. A hun dik tak thlira ngaihtuah chuan Gabriel-a pa, mi tam takin thawhpui harsa an tih em em Joe O'Cearuill kawk deuh reuhva rawn che a nih hmel hle.

Rooney hian a cover photo a thlak a, July thlaa a fapa Kai Rooney-a'n United nena scholarship contract a ziah lai thlalak a rawn hmang a ni. Pa tling leh lawm tak ni chunga a nupui Coleen nena an fapa, professional football khawvela ke pen ṭan mek an dinpui lai chu a rawn pho lang a ni.

He thlalak hnuaiah hian mipui tam tak chuan Wayne-a hmel hlim leh chapo miah lova a fapa a chhuang zia an sawi uar hle a, JJ Gabriel-a chhehvela buaina awm mek chu amah Gabriel-a thiam loh ni lovin, a pa thununna dik loh vang zawk a ni tih an kawk chiang hle bawk a ni.

Gabriel hi Nilaini zana Carabao Cup-a Brighton an hmachhawn turah United senior squad-ah koh tel tura beisei a nih laiin, Thawhlehnia a chhuah duh thu rawn puakchhuak hian engkim a tichhe ta a ni. Manchester United ang club lian hian kum 15 mi rawlthar leh a aiawhtute nawrluihna hnuaiah tlawm zawk nih an tum lo bur ang.

Wayne Rooney hian a football career pum deuhthaw United-ah a hmang a, a fapa Kai-a awmna club chu thil ropui tak tak thlen theihna hmun a ni tih a hre chiang hle. Gabriel-a pa mizia erawh thil pawi tak a ni a, United-ah hian hmabak eng tak nei tura ngaih a nih laiin a chhehvela thurawntu te hian an tichhe mek a nih hmel e.

Gabriel-a'n club chhuahsan a tum hun hi a hun lo hle a, a ṭhanlenna leh a hmasawnna kawngah pawh thil ṭha a thlen dawn lo a ni. He buaina chinfel theih dan kawng a awm maithei e, mahse tun dinhmunah chuan thil beiseiawm a nih hmel tawh loh hle a ni.