Old Trafford-a Manchester derby inkhelah Manchester United laka Manchester City-in inelna ti-lungawiloh thlak tak maia chakna goal an khung hnuah, United defender Lisandro Martinez chuan Premier League thuneitute hnen aṭangin hrilhfiahna leh insawifiahna a phut ta a ni.

First half-ah Phil Foden-a'n Bruno Fernandes a pet chawrh avangin City hian red card hmuin mi 10-in an khel a. Mahse mikhual lam City hian hma an hruai ta zawk a; Josko Gvardiol-a cross chu tlarhnung aṭanga a per kual hnuah Erling Haaland-a hmaah a tla a, Norwegian striker hian goal-ah a lo chantir a ni. A tirah chuan assistant referee chuan offside tiin a phar a, mahse VAR chuan khelmuala referee-te thutlukna chu thlakin, Haaland-a chu onside a nih bakah lailia awm Enzo Fernandez chuan ball a khawih lo niin an tlip ta zawk a, goal hi pawm a ni ta a ni.

Martinez hi Fernandez leh Haaland-a te hnaihtu ber central defender a ni a. Inkhelh zawha Sky Sports a kawmnaah match official-te thutlukna siam dan chungchangah a lungawiloh zia a phawrhchhuak nasa hle a ni. Argentina international chuan, "Offside niin ka hria. Ka hriatthiam theih loh chu hetiang dante hi a ni,"

"Fernandez kha a awm ve reng a. Ka hmaah tak a awm miau avangin a lamah ka kal a ngai a, chu vang tak chuan Haaland-a khan hnung lamah zalen takin hun a nei ta a ni. Tunah chuan inbengdaih ka tum mek a, insum theih hram ka duh a ni. Mahse derby match kan hloh bakah mahni mualah point thum kan hloh bawk si a, rilru a na em em a ni.

"Season tin mai kan club-ah lo kalin dante hi darkar khat emaw darkar khat leh a chanve chhung te min hrilhfiah a, an inringtawk thei hle bawk. Hemi hnuah hian Premier League angah mi panga emaw paruk velin hetiang tihsual lian lutuk hi an nei leh si a. Khawvela league ṭha ber, khawvela team ṭha ber ber leh player ṭha ber berte awmna a ni a sin.

"Tunah erawh hetiang rorelna dik lo (injustice) nen hian in lam kan pan a ngai ta a ni," tiin a sawi hial a ni. Sawi zawm lehin, "Ka tan a harsa hle a, player pahnih ka hmachhawn a, 50/50 dinhmuna ka awm miau avangin ka hmaa mi hmasa zawk kha ka bawh a ngai a ni. Thil awlsam te a ni. Tunah enge an sawi dawn tih i lo thlir phawt ang u," a ti bawk.

Thutlukna siam a nih hnu hian Premier League Match Centre chuan social media-ah thuchhuah siamin, "VAR chuan offside vanga referee-in goal a pawm loh kha an enfiah a, Haaland-a chu onside-ah a ding tih an finfiah hnuah goal pek turin thurawn an pe ta a ni. Chu bakah VAR chuan Fernandez-a chu offside position-ah awm mah se ball a khawih lo tih an pawm bawk a ni," tiin an thuchhuahah an tarlang a ni.