2026 nipui transfer window chhung khan Manchester club pahnih Manchester United leh Manchester City te chuan an tlar laili (midfield) thuam ṭhat hna ngawrh takin an thawk dun a.

Old Trafford-a Manchester derby inkhelah, City laka United 1-0 a an tlawm ṭum khan tlar lailia an player lak tharte chu an inhmachhawn hmasak ber a ni a, hetah hian Youri Tielemans leh Elliot Anderson te inhmachhawnna chu thlir a hlawh zual hle a ni.

Anderson hi kumin nipui bazar chhung khan United-in an midfield thuam nana an lak luh tum berte zinga mi a ni a, mahse Manchester City chuan sum ngah zawk nihna hmangin Nottingham Forest aṭangin £116m lai thehchhuakin an lalut ta zawk a. City chet dan hi chhangletin, United lam chuan fing takin Aston Villa aṭangin release clause £35m chauh hmangin Tielemans chu an lalut ve thung a, he Belgian midfielder hi an midfield thawmṭhatna kawnga an player lakluh langsar ber a ni chho ta a ni.

He derby match-ah hian United tan Tielemans chuan club academy chhuak Kobbie Mainoo chu a thawhpui a; Manchester City lamah erawh £116m man Anderson leh Chelsea aṭanga £125m senga an lak thar Enzo Fernandez te chu an intlar dun thung. Inkhelh tawpah City lamin point thum hlawhchhuak mah se, kumin nipuia midfield player an lak chungchangah chuan United hi an lungawi zawk ngei ang.

United-in an midfield pivot siam nana sum an sen zawng zawng chu £35m chiah a ni a (Mainoo chu academy chhuak a nih avangin a thlawn a ni), City erawh chuan Premier League-a midfield man to ber an rem chhuak thung a ni.

Inkhelh chhunga an chet dan (statistics) thlirin, Tielemans hian Anderson hi kawng hrang hrangah a khum chiang hle. Pass pek hlawhtlin kawngah (pass success rate) Tielemans hi a chungnung zawk a, innuaina (duels) ah pawh a hlawhtling tam zawk bakah, Anderson-a'n key pass vawi khat mah a neih loh laiin Tielemans chuan key pass pakhat a nei a, goal hlauhawm siam lamah pawh a langsar zawk a ni. Anderson erawh chu tlan tam lamah (running statistics) a chungnung thung a, mahse United tan chuan Tielemans an lakna man tlawm tak £35m hi sum hman fuh tak a ni tih a chiang hle.

Old Trafford inkhelah hian Michael Carrick-a naute hian midfield-ah thununna neiin ball pawh an chang tam zawk a, City star Phil Foden-a'n red card a hmuh hma hauh pawhin mual laili chu United kutah a awm zawk a ni. Mahse VAR thutlukna fuh tawk loh avangin Carrick-a team hi an tlawm phah ta hlauh a ni.

Hei bakah hian Brighton aṭanga £65m senga an lakluh Carlos Baleba chu a kerek hliam avangin a la chawl mek a, thla thara dam chhuaka a rawn inlan theih tawh dawn bawk avangin United tlar laili hi a la chak belh lehzual dawn a ni.