Manchester United legend Wayne Rooney-a fapa Kai Rooney chuan a pa hniakhnung zuiin United academy-ah a zangkhai chho hle a. Mahse, tlarhmaa a khelh danah a pa entawn lovin, Arsenal forward hlui Gabriel Martinelli-a khelh dan entawn zawk a nih thu a sawi chhuak.
Kum 2020-a Manchester United academy zawmtu Kai Rooney hi chak takin a rawn inkhawh chho a. Kumin nipui khan scholarship contract thar ziakin social media-ah, "Hna a ṭan ta e," tiin a lo tarlang tawh a ni. March thla khan hliam a tawrh avangin a season hmang zo thei lovin a chawl a, Manchester City laka FA Youth Cup final-a an tlawm ṭum pawhin a inlan thei ta lo a ni.
A pa tlarhma lailia a khelh ṭhin laiin, rawlthar Kai Rooney erawh mual sir lamah sawn a ni a, veilam ke hmang thiam a nih ang takin mual sir aṭanga laili lama ball kawi luh hi a chhawr zawng tak a ni.
TikToker Gabrielvpool nena inbiakna an neihnaah Kai chuan, "Right wing-a ka khel a nih chuan Martinelli-a khelh dan ka entawn a, striker anga ka khelh pawhin a khelh dan hi ka entawn zual a ni. Ball lo nghak leh chelh tlat (hold up) chi striker ka ni lova, tlarhnung venhimna hnung lama tlan tlang ṭhin chi ka ni zawk," tiin a sawi.
Kai-a entawn ber Gabriel Martinelli hi Arsenal tan match 278 a khelh hnuah, £60million-in Al Hilal a zawm tawh a ni. Martinelli hian November 2024 khan mual te zawka khelh chi futsal khan a hmasawnnaa pawimawh zia sawiin, thluak thleng chak zawka hmang tur leh hmun chep taka ball thunun thiam turin nasa takin a puih thu a lo sawi tawh bawk.
Kum 11 a nih aṭanga United academy-a awm tawh Kai hian thla liam ta khan a GCSE exam zawng zawng a kaltlang hnuah first-year scholarship contract a ziak a ni. A nu Coleen Rooney pawhin social media-ah a fapa thil hlawhtlinna hi lawmpuiin mipuite hmaa a chhuanzong zia a lo tarlang tawh a. Kum 17 a tlin hunah professional contract a ziak thei tawh dawn a ni.
An legend hlui Wayne Rooney chuan a fapa lakah pressure pek a tum loh thu sawiin, "A laka beiseina sang tak neih hi a fair lo em em a ni. Kum 15 mi (tuna kum 16) football khel nuam ti tak, hlim taka khel mek a ni a. A team-mate dangte aiin mipuite leh chanchinbute ngaihven a hlawh zawk tih chu a chiang a, mahse hei hi ṭha takin a hmachhawn thiam a ni," tiin a sawi bawk.
