Pathiannia Manchester derby ropui taka Manchester City hmachhawn tur Manchester United tan, head coach Michael Carrick chuan first-team player panga ngawt a chhawr theih dawn loh bakah, an left-back rinrawl Luke Shaw-a dinhmun pawh a la chiang lo hle.
Kum 31 mi England international Luke Shaw hian 2026-27 season-a Manchester United-in Premier League match thum an khelh tawhah khan bul a ṭan vek a. Mahse Ningani zana Old Trafford-a Champions League match-ah Azerbaijan club Sabah laka 4-0 a an chak ṭum khan squad-ah a tel ve ta lo a, a aiah hian Patrick Dorgu chu left-back-ah hian Carrick-a'n a chhawr ta a ni.
Ningani zana Champions League inkhelh hmain TNT Sports hnenah Carrick chuan Shaw-a dinhmun chungchang sawiin: "A taksa dinhmun enkawl uluk a ngai a ni ber mai. Everton kan hmachhawn ṭum khan a tha a khang (cramp) deuh avangin lakchhuah a ngai a, eng thil hlauhawm mah thlen nawn tir kan duh lo a ni. A theih ang anga enkawl kan tum a, he match zawh hian a dinhmun kan thlir leh ang," tiin a sawi.
Shaw-a dinhmun a chian loh bakah hian, United hian City hmachhawn tur hian player pawimawh dang panga an chhawr thei dawn lo bawk a ni:
Kumin nipui World Cup laia Uruguay tana a khelhna lamah a khup chhe tak tuar Manuel Ugarte chuan chawlh a la chhunzawm zel dawn a. Kum 25 mi midfielder hian a khup ligament na tak a tihhliam avangin zai a ni a, hun rei tak chhung khelmual a la hlat dawn a ni.
Defender Matthijs de Ligt pawhin kum 2025 aṭanga a lo neih tawh a hnungzang hliam chu kumin nipui khan zai a ni a. Kum 27 mi Netherlands international hi United first-team training zawm tawh mah se, rehabilitation programme hmangin a la inenkawl mek thung.
Tlarhma winger Amad Diallo pawh season inṭan hma training-ah a kerek a tihhliam avangin match li liam taah khan a inlan thei lo a. Kum 24 mi Ivory Coast star hi September thla tawp lam emaw October thla tir lamah emaw khelmualah a rawn kir leh theih chauh beisei a ni.
Goalkeeper Tom Heaton chu pre-season-a Paris Saint-Germain nen 1-1 a an inhnehtawk ṭuma a hamstring a tihhliam aṭang khan a la inlan leh lo a. He veteran goalkeeper a awm loh avang hian kumin nipuia an lak thar Karl Darlow chu number one Senne Lammens-a dawtah bench-ah a ṭhut leh a rinawm.
Brighton aṭanga an lakluh thar midfielder Carlos Baleba pawh kumin nipuia pre-season laia a kerek hliam tenau a neih vangin Carrington training complex-ah a la inenkawl mek a. Kum 22 mi Cameroon international hi a lo dam ṭhat vat theih nan fimkhur taka enkawl mek a ni bawk.
