Manchester United forward hlui Alejandro Garnacho chu Nilaini zana Aston Villa-in awlsam taka Carabao Cup match an khelh ṭumin bench-ah dah a ni a, he Argentina forward hi manager Unai Emery-a'n a chhawr duh loh mai bakah a career a 'tawp tawh' ti hiala sawi a hlawh chho mek.
Coventry City an hmachhawn ṭum hian kum 22 mi forward hian a theihna phochhuah theihna hunṭha a neih beisei a nih laiin, khelmual chhung lut lovin bench-ah a ṭhu nileng thak a, hei hian inkhel entute leh fan-te rilru a tibuai hle a ni. Inkhelh zawh nan minute 15 vel a la awm tihin Emery-a'n player thlak theihna vawi nga a neih zawng zawng a hman zawh tak vek avangin, Garnacho hian mual a rap dawn lo tih a hre chiang nghal a ni.
Kumin nipui bazar chhung khan Garnacho hian Chelsea aṭangin loan-in Villa hi a zawm a, mahse a club tharah hian inkhelhna hmun a chang meuh lo a ni. Inelna hrang hrang khelhah match thum a zawnin bench aṭanga luh tir loh (unused substitute) a ni tawh a. Social media lamah pawh fan-te chuan he rawlthar hmabak tlakhniam chhoh mek dan chu an sawi zui nasa hle a ni.
Fan pakhat chuan, "Garnacho hi chu a tawp chiang tawh a ni, Cup game satliahah pawh bul a ṭan thei lo a nih hi?" tiin a sawi a, dang leh chuan, "Garnacho hi hetah hian a tawp nghal der tawh em ni?" tiin a zawt bawk. Ṭhenkhat chuan season liam taa Liverpool aṭanga loan-a Villa lo zawmtu Harvey Elliott-a chet chhiat dan nen khaikhinin, "Garnacho hi 100%-in Harvey Elliott-a ang chiah kha a ni leh ta," tiin an sawisel hlawm a ni.
Aston Villa striker hlui Stan Collymore pawhin social media-ah thuziak chhuahin, "Zanin chu Garnacho a inlan miah lo mai. A tana hunṭha hnuhnung ber pawh a inkharkhip ṭep tawh a nih hmel," tiin a dinhmun derthawn zia a tarlang.
Second half chhung zawng deuhthaw Villa hian 3-1 a hma an hruai chung pawhin Garnacho hi luhtir a ni lo va, manager Emery chuan Emiliano Buendia, Nicolas Jackson, Johan Manzambi leh Alysson te zawk khelmualah a luhtir a ni.
Kum 2025 nipui bazar khan Garnacho hian £40million senga Manchester United chhuahsanin Chelsea a zawm a. Mahse Old Trafford a chhuahsan hnu hian theihna tak tak a la pholang thei meuh lo a ni. Season liam ta khan inelna hrang hrangah match 43 inlanin goal 8 a khung a, midang pet luh tur vawi 4 a siamsak bawk a; amaherawhchu a inlan tam zawk hi bench aṭanga lut a nih avangin, inkhelh tam zawk beiseiin Villa lamah loan-in a insawn ta a ni.
Kum 2020 khan Atletico Madrid academy aṭangin United hian an lalut a, Old Trafford-ah first-team tan match 144 khel hmanin goal 26 a khung a, assist vawi 22 a nei hman a ni. Hemi hnu hian manager lamin an chhawr tam tak loh avangin chhuah a ngen ta a nih kha.
Emery-a'n a ngainat tawk loh nia ngaihdan awm mek mah se, Villa boss chuan forward naupang zawk hian hmasawnna tur a la ngah tih pawmin, a tan ruahmanna thui tak an neih thu a sawi thung. Emery chuan, "Season liam ta ṭan tir lama Chelsea tana a khelh ṭhat lai leh kum hnih liam taa Manchester-a a theihna ang kha nei leh turin kan duh a ni," tiin a sawi.
Villa manager chuan sawi chhunzawmin, "Hun rei tak atan kan lakluh a ni a, hahdam taka awm a, a theihna tak tak a phawrhchhuah theih nana inrintawkna a neih let leh theih nan kan pui ang. Thil lawmawm hmasaber chu a nungchang (attitude) hi a ni a. A nungchang hi a pawimawh em em a, kan thil tum thleng turin a inpe zui zel bawk a ni," a ti.
