Carabao Cup inkhelah 2-0 a hma an hruai hnuah Brighton & Hove Albion lakah 3-2 a an tlawm tak avangin Manchester United boss Michael Carrick chuan a lakah beiseina a san rualin pressure a neih phah loh thu a sawi.

A zawnin season hnih chhung chu United hi an game hmasa berah Carabao Cup aṭangin an tla nghal der a ni. Old Trafford-a inkhelah hian Shea Lacey leh Mason Mount te goal hmangin minute 10 chhung lekin United hian 2-0 in hma an hruai hman a. Mahse, chawlhlawk hma chiahin Brighton tan Charalampos Kostoulas chuan an siphurh a rawn sut ṭan a ni.

Second half ṭan aṭanga minute 15-na velah Carrick hian player pathum luhtir tura a inpuahchah lai mekin, United tlarhnung fimkhur tawk loh chu remchangah lain Pascal Gross chuan Brighton tan an siphurh a rawn sut zo ta mai a. Carrick-a player lakluhte hian danglamna an rawn thlen zui thei lova, Maxim De Cuyper chuan goal thumna rawn khungin Seagulls hian hnehna ropui tak an chang ta a ni. Kum 1976-a Tottenham laka 3-2 a an tlawm hnu, kum 50 chhunga a vawikhat nan mahni mualah goal hniha hma an hruai hnua United an tlawm leh hmasak ber a ni hial bawk.

Inkhelh zawha press conference-ah Carrick chu a hna dinhmun a derthawng ta em tih leh sawiselna a tawk ta em tih an zawt a, mahse hetiang ṭawngkam hi a pawm loh thu a lo sawi.

Carrick chuan, "Kan chak chuan miin hna ṭha tak ka thawk an ti ṭhin a, kan chak loh va result ṭha kan hmuh loh erawh chuan a mawhphurhna tam zawk chu keima chungah a tla ṭhin. Chu chu ka pawm thlap a, hetiang dinhmun aṭang hian tlanchhiat ka tum lo. A nih dan tur reng a ni," a ti.

"Chutih rualin, keimahah hian pressure ka nei miah lo. Hetiang hian min tibuai pha lo hrim hrim a, tak takah chuan min tibuai miah lo a ni," tiin a sawi zui bawk.

United hian insiamṭhain hma an sawn leh ngei theih a beisei tlat thu sawiin Carrick chuan: "Engpawh nise kan thlak danglam thei ngei ang. Player ṭha tak tak kan nei alawm. Tun kar hnih khat chhung khan kan che ṭha tawk lo va, tun dinhmunah hian a hrehawm ang reng hle. Mahse, chumi vang chuan football match kan hneh leh vat thei lo tihna a ni chuang lo. Hetiang hun hi an lo paltlang tawh ṭhin tih player-ten an lo tarlang tawh a, team anga kan theihna pawh kan lo fiah tawh bawk. Mahse, liam tawh thil chu thil lian tham a tling tawh lo a, a dawta thil thleng tur zawk hi a pawimawh ber chu a ni," a ti.

Match zawh ruala fan-ten an au el (booed) chungchang zawhna chhangin, "A ṭha lam emaw a chhe lam pawh nise thil thleng chu a lang chiang reng alawm. A thleng zung zung a, thil tlemte a pialsual a, zanin hian cup aṭangin kan tla ta a ni. Boruak awmdan chu a rit ve hle a, a nihna tak sawi chuan chutiang chuan a lang ngei a, mahse hetiang reng hi a nih kher a ngai lo. Inkhelah hnehna kan chan leh theih chuan thil hi kawng dang daihin a kal leh thei a ni," tiin a sawi.

TV interview-ah Carrick chuan goal mawi tak khungtu Lacey chu a fak zui hle a, press conference-ah pawh he thu hi a sawi nawn leh a ni. "Shea-a tana hun ropui tak, a chhungte, a ṭhiante leh academy pumhlum tana thil chhinchhiah tlak tak a nih laia, academy player hetianga a rawn chet hnuah hetiang boruakin a hliahkhuh ta daih hi a pawi hle a ni. Mahse, thil a daih zawk hunah chuan amah hian a theihnghilh mai dawn lo a ni," a ti bawk.

Manchester United hian Pathianni hian Premier League match khel turin khualmualah Fulham an pan dawn a ni.