Manchester United academy chhuak Scott McTominay chu a naupan lai club-ah hian a kir leh mai thei anga sawi rik a nih mek laiin, United hotute chuan he midfielder lakluh leh chungchangah hian thutlukna lian tak an siam fel ta. Kum 2024 nipui transfer bazar chhung khan McTominay hian United chhuahsanin Italian club Napoli a zawm a, hemi hnu hian a chet ṭhatna a pholang chho hle a ni.
He Scotland international hian Serie A title a lakpui bakah, a season hmasaberah MVP lawmman a dawng hial a, Napoli tana player rintlak leh pawimawh berte zinga mi a ni chho mek. Mahse, Napoli nena contract thar ziah chungchanga an inbiakna a kal tluang thei tlat lo. McTominay-a aiawhtute leh Napoli hotute hi a hlawh tur chungchangah an inrem hleithei lo a, hei hian chhuahna kawngka a hawnsak leh thei tlat a ni. Napoli hian McTominay man atan hian €25m aṭanga €30m vel an phut a, hei hi United leh Aston Villa tan chuan pek harsat tur a ni lo.
Chutiang a nih laiin, Football Insider-in a tarlan dan chuan United hian an academy chhuak lakluh leh hi an rilruk rih lo thung. United hian an squad thuam nan player naupang zawk lakluh an duh zawk a ni. McTominay hi kumin December thla hian kum 30 a tling tawh dawn a, Red Devils-ten player an zawn mek dinhmun (profile) nen a inmil chiah lo a ni.
Peter O'Rourke chuan he transfer chungchang hi sawiin, "Manchester United-ah a kir leh a rinawm loh hle a ni. Tunah hian kum 29 a ni tawh a, December-ah kum 30 a tling dawn a, a career tawp lam a hnaih chho ve tawh a ni. Italy-ah hun ṭha tak a hmang a, Napoli tan a che ṭha em em a, season hnih liam ta khan league title an lakna kawngah a pui a, Scotland tan pawh a theihna lo pholang tawh a ni," tiin a sawi.
United hian tun hnaia transfer bazar inhawngah khan tlar laili thuam nan sum tam tak an lo hmang tawh a. Head coach Michael Carrick-a hnuaiah hian tlar laili thuam nan Andrey Santos, Youri Tielemans leh Carlos Baleba te an lo la tawh a ni. Chuvang chuan, nakkum nipui transfer bazar-ah chuan tlarhnung (defence) thuam chak lamah an rilru an sawrbing tawh zawk tura ngaih a ni.
