Manchester United defender hlui Matteo Darmian chuan Serie A club Bologna a zawm fel ta tih nemnghet a ni ta.
Bologna-in thuchhuah an siamnaah, "Bologna FC 1909 hian defender Matteo Darmian chu June 30, 2027 thleng daih tur contract ziahpuiin an lakluh fel thu an nemnghet a ni," tiin an tarlang.
Kum 1989-a piang Darmian-a hi hmun hrang hranga khel thei (versatile) leh rintlak tak a ni a, mual sir (wide) leh tlarhnung thuk zawk (deeper position) ah pawh a khel thei vek a ni. Bologna thuchhuah chuan sawi belhin, "Tawnhriat ngah tak player a ni a, a career hlawhtling leh sei takah hian bung thar a rawn hawng leh ta a ni. A theihna langsar zualte chu ball thiamna (technique) ṭha tak, khelmuala a hmun tur hriat chianna (positional awareness) leh tactical discipline ṭha tak neih te a ni a, chutih rualin a khelh dan a rintlak reng a, inkhel a chhiar thiam bakah tlarhnung venhim leh tlarhma nawr kawngah a in-balance ṭha em em a ni," tiin an tarlang.
Hriat theih danin, Darmian-a hian tun season tawp thleng daih contract a ziak a, a duh chuan thla 12 dang pawhsei theihna (option to extend) a awm bawk a ni. Season liam ta tawp khan Inter Milan aṭanga a chhuah hnuin kumin nipui chhung zawng khan contract nei lo (free agent) in a lo awm tawh a ni.
Inter tan hian inelna hrang hrangah match 218 lai a khel hman a, Serie A title vawi thum, Coppa Italia vawi thum leh Supercoppa Italiana vawi thum a lakpui bakah, kum 2023 leh 2025 khan Champions League final a thlenpui bawk a ni. He Italian defender hi tun kar tawpa khualmualah Lecce an lênchilh hunah Bologna tan hian a inlan thei nghal tura ngaih a ni.
Darmian-a hian kum 2015 leh 2019 inkar khan United-ah season li chhung hun a lo hman hnuah Parma a pan a. United-in Torino aṭangin £12.7 million vel sengin an lo la a, manager Louis van Gaal-a hnuaiah kum nga thleng pawhsei theihna option telin kum li contract an lo ziahpui a ni.
Kum 2015/16 campaign inṭan ni hmasa berah Tottenham Hotspur 1-0 a an hneh ṭum khan United tana a debut a siam a, khami thla August chhung khan United-a player ṭha ber (Player of the Month) atan thlan a ni hial a ni. United tan hian match 90 chuang inlanin, FA Cup, EFL Cup leh Europa League nomawi lian chawi turin a lo ṭanpui tawh a ni.
