Manchester United rawlthar theihna sang tak nei JJ Gabriel chuan Leigh Sports Village dressing room a luh leh lai chuan a hmelah hlimna a khat a. Gabriel hian Sabah youth team lakah hat-trick a khung zo chiah a ni. An manager Adam Lawrence pawhin final whistle a rik hnuin a fak hle a, "dinhmun ṭha takah a ding" tiin a sawi hial a, mahse darkar khat hnu lekah a social media chu a thai bo (wipe) nghal vek thung a ni.
Gabriel-a social media bio aṭangin United hming chu paih a ni a, '@nikefootball' tih chiah a dah a. Eng emaw thil thleng a awm tih a hriat theih nghal a, chuvang chuan Thawhlehnia club chhuahsan a dil tih thu rawn thang thut pawh hi thil beisei loh tawp chu a ni lo.
Chuti chung pawhin he thil hian United chu a barakhaih hle a ni. Engvanga tun dinhmuna club chhuahsan dil thut nge a nih tihah hian club chhungrilah pawh hriatthiam lohna a lian hle a, a chhan chu naktuk zan match-ah an club chanchina debut siam thei naupang ber a nih theih nan senior squad-a telh an lo ruahman mek lai a ni.
United chuan a contract neih lai la bak enin he boruak hi siamṭhat theih a la nih an beisei a. Gabriel hi tun dinhmunah chuan a inziahluhna (registration) sut theih a ni lova, mahse nakkum nipuiah chuan chhuah theihna hun remchang a nei tawh dawn a, United erawh chuan an player theihna sang tak hi chan an tum lo bur a ni. Thudawnna ṭhenkhat chuan he buaina hi sum hmangin a la chinfel theih mai an rin thu an sawi a, mahse chu chuan a chelh zo dawn em tih leh United hian sum engzat nge thehchhuah an inhuam dawn tih erawh hriat a la ni lo.
United hian Gabriel hnenah first-team pan theihna kawng a awm tih lantir nan theih tawp an chhuah tawh a, a kum ngaihtuahin duhsakna danglam bik an hlan reng a ni. A tir phat aṭangin, Old Trafford press conference room-ah Cristiano Ronaldo-a fapa nen an lo phochhuak tawh a. Naupang te a la nih laiin Marcus Rashford nen phone-ah inbiaktir an ni a, Carrington-ah manager hlui Ruben Amorim an inhmuhtir a, Old Trafford-ah Sir Alex Ferguson nen inbiakna hun an siamsak bakah an chhungkua chu directors' box-ah vawi duai lo an sawm tawh bawk a ni.
Amorim nena an inhmukhawm thlalak chu a pa'n social media-ah a thehdarh a, Amorim a lawm loh phah hle a, paih leh nghal ni mah se a darh hman hle a ni. Club lam hian eng pawh ti mah se Gabriel hi an chelh zo kher lo maithei tih an hre lawk sa a, a chhan chu hliam vanga football chawlhsan hma a pa hian a fapa hi Barcelona tana inkhel turin a duh em em ṭhin vang a ni.
April 2025 khan kum 14 mi niin Under-18 debut a siam a. Khami hnu thla reilotêah chhuah a lo tum tawh a, mahse director of football Jason Wilcox leh CEO Omar Berrada te nena inbiakna an neih hnuah chelh hram a ni. Kha mi ṭum khan Gabriel chuan a mittui a hru hial a, United tana khelh a chak em avangin a cham zui ta a ni. Staff-te pawhin a nungchang zawi leh inngaitlawm tak chu an fak hle ṭhin.
Mahse tunah chuan a aiawhtute chuan chhuah an dil leh ta thut a ni. Pre-season-ah khan Trondheim-a Rosenborg 5-0 a an sawp ṭumin squad-ah a tel a, khelmualah lut lo mah se a hlim hle a, a nu nen a jersey kengin thla an la dun hial a ni. Michael Carrick chuan Stockholm-a Atletico Madrid an hmachhawn ṭumin a vawikhat nan a chhawr a, mahse pre-season chhunga minute tlemte chauh a khelh kha a aiawhtute ngaihdan a ni ta chiah lo a ni.
Gabriel-a pa hian Premier League-a debut siam thei naupang berte zinga telh a duh hle a. Ethan Nwaneri (kum 15 leh ni 181), Max Dowman (kum 15 leh ni 235) leh Jemery Monga (kum 15 leh ni 271) te chu debut siam naupang berte an ni. Hull City an hmachhawn ṭum khan kum 15 leh ni 320 mi a ni a, Ipswich lakah kum 15 leh ni 328 a ni bawk. Khang match-ah khan lut se chuan league chanchina debut siam naupang ber palina a ni thei dawn a. A aiawhtute chuan Nwaneri, Dowman leh Monga te aia theihna nei sang zawkah an ngaih avangin first-team-a khelh tam an beisei hle a ni.
