Manchester United academy-a rawlthar theihna ngah tak, wonderkid tia sawi JJ Gabriel chuan a hmabak tur club thar tur chungchangah thutlukna a siam fel tawh nia tarlan a ni a. He rawlthar kum 15 mi hian Champions League nomawi vawi tam lo chawi tawh Spanish club lian Real Madrid chu pan a thlang ta niin transfer chanchin thar lam chuan a tarlang a ni.
101GreatGoals thudawnna chuan kum 15 mi Gabriel hian thla thara kum 16 a tlin veleh Spain khawpui panin Real Madrid hi a zawm nghal dawn niin a tarlang a. Real Madrid lam hian he English rawlthar theihna ngah tak lakluh theih dan tur chungchangah hian Manchester United hnenah official-in dawrna an thehlut tawh bawk niin thu dawn a ni. Gabriel-a'n a pianchampha vawi 16-na a thlen hma ngeia hetiang inremna kawng hi dap fel an duh ber nia hriat a ni bawk.
JJ Gabriel hi tun hnaia Manchester United youth system aṭanga rawlthar chhuak zinga beiseina nei sang ber leh sawi hlawh ber pakhat a ni a. Tlarhma lama theihna sang tak nei, goal khung kawnga thawh hlawk em em leh ball thiam danglam bik a nih avangin club chhung leh pawnah ngaihven a hlawh hle ṭhin. Old Trafford club tan chuan hetiang rawlthar theihna sang tak mai, nakina first-team player pawimawh ni thei tura an ngaih Real Madrid anga European champion hlun lamin an lo dawr chawt mai hi channa lian tak a tling thei dawn a ni.
Real Madrid lam hian kum eng emaw zat chhung chu khawvel pum aṭanga player naupang theihna ngah tak tak lakkhawm hi an club ruahmanna pui ber pakhatah an lo hmang tawh ṭhin a. Tunah pawh hian Gabriel-a theihna hi an hmuh hmaih loh avangin an squad thuam ṭhat chhoh zelna atan leh an club hmakhua thlirin hma an la nghal chat a ni. Gabriel-a tan pawh khawvela club ropui ber zinga mi Bernabeu tualzawl pan theihna hun remchang a inhawng dawn tihna a ni a, a career-ah rahbi thar pawimawh tak a ni ngei bawk ang.
United lamin an academy naupang zinga chhuanvawr hi chelh zui dan kawng an dap dawn nge, Real Madrid-in dawrna an thehluh hi an pawm zawk dawn tih erawh chian lohna a la awm nual a. Mahse player lam hian Real Madrid zawm hi a duh tawh zawk nia sawi a nih avangin, thla thar maia a pianchampha vawi 16-na a tlin hunah a chanchin hi a chiang chho zual tura ngaih a ni. He thil hian transfer thuthang hrang hrangah sawi zui a hlawh chho hle bawk a ni.
