Manchester United manager Michael Carrick chuan tun season chhungin an captain Bruno Fernandes chu chawlh hahdamna hun a la pek ngei tur thu a sawi a, mahse Sabah lakah 4-0 a an chak ṭumin a zawnin match li (4) chhung minute 90 a khel tluan leh ta tho a ni.
United-in Champions League bul an ṭanna inkhelah hian Fernandes chuan goal a khung a, first-half zawhah 3-0 a hma an hruai theih nan a thawhhlawk hle. Pathianniah Manchester derby hmuhnawm tak an hmachhawn dawn avangin, half-time aṭang khan Carrick chuan player thlak kual hna a thawk ṭan a ni.
Substitutions vawi nga (5) theih zawng zawng hmang zoin Youri Tielemans, Kobbie Mainoo, Benjamin Sesko, Bryan Mbeumo leh Patrick Dorgu te chu lakchhuah an ni a. Mahse kum 32 mi Fernandes erawh khelmualah a la awmtir tlat thung a, a inkhelh hun chhung chu a tam chho tawlh tawlh a ni.
He thutlukna hi sawisel a hlawh chho nghal a, a chhan chu inkhelh zawh hnuah Fernandes hi Old Trafford chhuahsanin ke bai chungin a kal tih hmuh a ni. Second half chhung khan na tak takin a inpal tlu a, a khelbawrah hliam na vak lo a tawrh bakah inkhelh tawp dawn lamah hlawm reng khawpa tlawh a tawk bawk a ni.
Sabah an hneh aṭanga ni thum lekah Enzo Maresca-a naute Manchester City an hmachhawn leh nghal dawn avangin, Fernandes hian a taksa dam chian hman nan hun a nei tlem hle a ni.
A captain ke bai lai an hmuh hmain Carrick hian chanchinbumite a lo be hman a, hnehna an chang chiang tawh chung pawha Fernandes a lakchhuah loh chhan a sawifiah nghal a ni.
Carrick chuan, "Player panga (5) chiah thlak theihna kan nei a! Khatiang boruakah khan thutlukna eng emaw siam a ngai tlat a ni. Ani pawh midang ang tho a ni a, match tam tak a khel tawh tih kan hria; mahse hetiang dinhmun hmachhawn thei tur hian kan squad leh team hi kan buatsaih chho mek a ni. Zanin kha chu thil thleng ve palh mai a ni a, thutlukna siam ngai a awm a, khelmuala a awm tlang a ngai ta a ni," tiin a sawi.
January thlaa Carrick-a'n mawhphurhna a lak aṭang khan match 21 an khelh tawhah Fernandes hian minute tin a la khel tluan zak vek a. Kum 2020 January thlaa Sporting aṭanga a rawn zawm hnuah Premier League fixture 244 an khelh tawh zinga match 10 chauh a la hmaih a ni.
Sabah an hmachhawn ṭum hian Luke Shaw pawh Nilainia training-ah a tel theih loh avangin a inlan lo a, derby match hma hian a dinhmun endik leh phawt a ni ang.
Shaw-a chungchangah Carrick chuan, "Kan la nghak phawt ang. Zanin atan chuan a hriselna kan uluk deuh a ni. Za a za (100%) a la inpeih chiah loh avangin risk kan la duh lo a ni. Ni hnih khat lo awm turah hian a dinhmun kan en zui zel ang," tiin a sawi.
