Manchester United chhuahsan hnua hun rei tak chhung club nei lova awm (free agent) Dutch defender Tyrell Malacia chuan club thar hmuh theihna kawngah hmalam a pan chho ve leh ta a. Malacia hian Major League Soccer (MLS) club FC Cincinnati nen contract an ziah theih nan an hnenah hian trial a nei ṭan a ni.

MLS dan hnuaiah hian season tawp dawn hnaih leh playoff khelh chhungin club-te'n player thar an lak belh theih tawh lohna hun, 'MLS Roster Freeze Date' chu October ni 9 a ni a. FC Cincinnati hian Malacia hi an squad-ah telh an duh a nih chuan he hun tiam a ral hmain inremna an ziahpui a ngai dawn a ni.

Kum 2022-a Feyenoord aṭanga Manchester United zawmtu Malacia hi June ni 30 khan United chuan an contract an tihtawpsak a, hemi hnu aṭang hian club nei lovin a la awm zui ta reng a ni. United-a a lo khelhpui ṭhin Casemiro pawh hetianga chhuah zalen a nih hnu hian MLS club dang Inter Miami chuan an lo lalut tawh a, anni hi FC Cincinnati nena conference khata inhmachhawn ṭhin an ni bawk. United aṭanga chhuah zalen ve tho Jadon Sancho erawh chu tun thlengin club nei lovin a la awm thung.

FC Cincinnati chuan thuchhuah siamin, "FC Cincinnati hian Malacia-a agent nen inlaichinna ṭha tak kan nei a; team nena training an neih dunna hi club leh player lam ve ve tan kan inmil dawn em tih fiahna hun remchang a ni," tiin an puang a ni.

United-a a season hmasa ber 2022-23 chhung khan Malacia hian theihna ṭha tak lantirin mual a luah hneh hle a, a bikin Manchester derby-a a khelh dan te chu United ṭantute fak a hlawh hle a nih kha. Mahse hemi hnu hian hliam na tak takin a tlakbuak zui ta char char a, khelmual chhungah hun harsa tak a paltlang phah a ni.

Nipui liam ta khan United hian Malacia hralhna tur an zawng hmu zo lo chu sawisel hlawh mah se, a hliam dinhmun avang khan lei duhtu club an vang hle thung. Season liam ta chhung pawh khan United-ah reserve dinhmun chauh luahin, substitute aṭangin vawi thum chauh a inlan hman a ni. Hetianga inkhelh hun a hmuh tlem lutuk hian club thar zawn kawngah harsatna lian tak a thlen a ni.

July thla liam ta khan kum 26 mi left-back hian a taksa fitness chu a ṭhat ber lai a thlen leh tawh thu leh, inkhelh lehna tur hun ṭha a nghah mek thu a lo sawi chhuak tawh a. Beisei aiin hun a duh rei deuh zawk mah se, tunah chuan Cincinnati lamin kawngka an lo hawnsak takah chuan a career dinthawh leh nan hun ṭha a nei dawn ta a ni.