Manchester United captain Bruno Fernandes chuan Champions League-ah record ropui tak a nei tih Sabah laka an chet ṭhat hnuah pholang a ni a, United chanchinah hetiang record nei ṭha thei hi legend pakhat chauh an awm.
Ningani zan khan Old Trafford-ah Michael Carrick-a enkawl Manchester United chuan Azerbaijan club Sabah chu 4-0 ngawta sawpin, 2026-27 Champions League league phase-ah an point thum hmasaber an hlawhchhuak a. Kum 32 mi, Portugal international Fernandes hian minute 90 chhung inkhel tluanin first half-ah goal a khung a, tun season inelna hrang hranga a goal lina a khung tling ta bawk a ni.
StatMuse tarlan danin, Sporting CP star hlui Fernandes hian United tan Champions League-ah match 20 a inlan tawhnaah goal 7 a khung tawh a, assist vawi 20 ngawt a nei tawh bawk a ni. A career chhung hian Sporting CP leh Manchester United tan Champions League hi a lo khel tawh ṭhin a ni.
Fernandes-a theihna hi Europe inelna sang berah hian a langsar zual em em a, a bik takin United striker hlui ropui Ruud van Nistelrooy nena an record tehkhin hian a ropui zia a chiang zual hle. OptaJoe-in social media X (a hmaa Twitter)-a a tarlan danin, Champions League-ah Fernandes hian United tan minute 99 dan zelah goal a khung emaw assist a nei ziah a ni.
He record ropui takah hian United chanchina forward langsar Ruud van Nistelrooy chiahin a khum a; he striker hlui hian minute 79 dan zelah goal a khung emaw assist a nei ṭhin a ni. Kum 50 mi Dutchman Van Nistelrooy hian United-a season nga a hman chhung khan Champions League-ah match 43 khelin goal 35 lai a khung a, khelmualah minute 3,553 a hmang hman a ni. Hei hi tun dinhmuna Fernandes-a minute 1,334 khelh aiin a tam fê zawk a ni.
Tun 2026-27 campaign chhung hian Old Trafford-a Red Devils match li khelh tawhah Fernandes hian bul a ṭan vek a, minute 90 a khel tluan vek bawk. United skipper hian thla liam ta khan Premier League-ah Ipswich Town 5-2 a an lehthal ṭum pawh khan hat-trick a lo siam tawh bawk a ni.
