Manchester United leh Leeds United ten Pathiannia Elland Road-a inkhelh an hmachhawn hmain, Leeds head coach Daniel Farke chuan sawiselna tawk mek United boss Michael Carrick chu a chhan tlat a, ban phu a nih loh thu a sawi.
Season liam ta January thla khan United chu dinhmun khirh takah an ding a, khatih lai khan Carrick hi interim head coach atan Old Trafford-ah a kir leh a nih kha. Team boruak rawn chawikangin pathumna dinhmunah a hruai thleng a, Champions League khel turin a tlinpui bawk a ni.
Hemi hnu hian Ineos chuan Carrick hi a nghetin head coach atan an ruat zui ta nghe nghe a, mahse tun 2026-27 season tharah erawh an result leh khelmuala an chet dan a tlahniam ta hle thung. United hian inelna hrang hrangah match kua an khelh tawh aṭangin vawi hnih chauh hnehna an la chang a ni. Chanchinbu lamah manager thlak chungchang sawi a ri chho ṭan a, Antonio Conte pawhin he hna hi a awl a nih chuan chelh a duh nia tarlan a ni bawk.
Champions League-ah Atletico Madrid laka 2-0 a an tlawm hnuah United hian Elland Road an pan dawn a. He match hi Lisandro Martinez-a'n interview a pek hnua darkar 48-a ngaihdam a dil hnuah an inkhelh hmasak ber tur a ni bawk ang.
United leh Leeds te hi hmelma lian tak ni mah se, Zirtawpnia chanchinbumite a kawmnaah Farke chuan chu inelna chu dah ṭhain Carrick-a dinhmun a lo humhim a ni. Football khawvela hun rei tak lo awm tawh Farke chuan he hnaa pressure awm dan chu a hriat chian thu leh, United enkawl tluk zeta pressure sang a awm tlem hle tih a sawi bawk. Tun season-a United chet chhiat chhoh hle chung pawhin a hmachhawn tur manager hian ban a phu loh thu a tarlang chiang hle a ni.
Farke chuan chanchinbumite hnenah, "Michael leh coach naupang zawk ka ngaihtuah hian thil ṭha tak a ti a ni. Middlesbrough-ah pawh a che ṭha em em a nih kha. Match ruk hnuah United-ah hian a che chhe em em bik lo; table laili velah an awm mek a ni. An ngaihdanah chuan title inchuh an duh ngei ang tih chu a hriat reng mai.
"Coach naupang a nihna anga hetianga nawr vak hi a ngai lo. Coach leh player a nihna anga a thil lo tih tawhte hi a ropui hle a ni. Carrick sawisel chiam hi kawng dik zawh a nih ka ring lo a, eng kawng mahin ṭangkaina a nei dawn lo. Ka duh lo va, ka hrethiam hek lo. British coach naupangte hi kan humhim a ngai a ni; German mi ni mah ila, British mi chanve angah ka inngai ve a. Anni hi kan thlawp tlat tur a ni a, theihna sang tak nei coach kan kawl hi kan lawm hle tur a ni zawk," tiin a sawi chhuak a ni.
Kar tawpah hian Carrick chuan United chu chak kawngah a hruai kir leh thei ang em tih chu thlir a chakawm tawh hle a. United hian an hnehna hnuhnung ber chu thla khat liam taa Champions League-a FK Sabah an hneh kha a ni tawh a ni.
