Manchester United-in Old Trafford-ah Brighton lakah 2-0 a hma an hruai hnuah hnehna an chan zawh tak loh avang leh, inkhelh zawha an ṭantuten an au el (booed) tak chiam hnuah, head coach Michael Carrick chuan hetiang club lian tana khelh vanga sawiselna leh buaina rawn thleng mek chu tuar chhuak thei tura rilru paukhawh turin a player-te a chah ta a ni.

Old Trafford-ah hian United chuan Shea Lacey leh Mason Mount-a te goal khung hmangin hma an hruai zet a, mahse Brighton lamin ropui taka rawn chhangletin hnehna an rawn chang zui ta a. United tana kum 50 chhunga mahni mualah 2-0 a hma an hruai hnuah an tlawm leh vawikhatna a ni bawk. Referee-in inkhelh tawp hamrik a ham rual khan Stretford End-a awm fan-te chuan player-te chu au elin, "Engthil rapthlak nge maw ni ngai?" ti hialin lungawi lo takin an au khum a ni. He inkhela an tlawm hi Carrick-a naute tan chona lian tak niin, tun season inelna hrang hranga match ruk an khelh tawh zinga vawi thum ngawt an tlawmna a ni a, cup inelna aṭangin an tla zui bawk.

Tun season bul an ṭan chhiat em avang hian a lakah pressure a sang tawh em tih chanchinbumite zawhna chu Carrick hian a ngaipawimawh lo hle a. Mahse, an chunga sawiselna leh boruak chhe rawn thleng mek chu dawngsawng thei tur leh hmachhawn thei tura an inpeih a ngai tih a player-te hnenah a hrilh thung a ni.

Carrick chuan, "Boruak a awm tih chu kan vaiin kan hria. A ṭha lam pawh nise a chhe lam pawh nise thil a awm ve reng a, mahse chung boruak chu engtin nge i hmachhawn a, i dawnsawn tih hi thil pawimawh ber chu a ni. Helai hmuna awm hian hun a liam hnuah mi a tipaukhawhin a ti-tlangval ṭhin a, engtin nge i hmachhawn tihah a innghat a ni. Chu chu i theihna sang ber phawrhchhuak thei tur zawnga i tawrh chhuah a ngai a, kan zain team pum anga kan theihna leh inrintawkna nei chungin football match chu kan la chak thei reng a ni tih kan hriat a ngai a, chak tur hian hetah hian kan awm bawk a ni," tiin a sawi.

Carrick chuan sawi chhunzawmin, "Zanin khan thil tlemte kan thunun zawh loh avangin cup aṭangin kan tla ta a, thil a thleng zung zung hle a, mahse club chhung vela boruak awm erawh a lian tham hle mai," a ti bawk.

Season liam ta khan Carrick hian United hi match 17 enkawlin match 12-ah hnehna a chanpui a, vawi thum draw niin vawikhatmah an tlawm lo a, Champions League khel turin a hlangkai a nih kha. Mahse, tun season-ah erawh boruak a inthlak chak hle a, a laka beiseina leh nawrna chu a sang ta hle a ni. Kum 45 mi Carrick hian kar tawpa Fulham an lenchilh hunah chak ngei ngei ngai match a hmachhawn nghal dawn tih sawi theih a la ni chiah lo nangin, pressure erawh a sang chho hle tih a chiang. Amaherawhchu, he English manager hian pressure chu engahmah a ngaih loh thu a sawi thung.

"Ka lakah hian eng pressure mah ka hre lo. Eng kawng zawng pawhin, chu chuan ka rilru a tibuai chhin miah lo a ni. Pawn lam boruak kal vel dan leh khawvel khawsak dan hi ka hrechiang a, mahse chu chuan min tibuai pha lo hrim hrim," a ti.

Tun season bul ṭan chhiatna lian tak aṭang hian tho chhuak lehin, theihna an neih phawrh chhuak turin Carrick hian a player-te chu a thlawp tlat a ni. "Kan insiamṭha leh thei ngei ang tih ka chiang a ni. Player ṭha tak tak kan nei a, kar khat emaw kar hnih thum chhung boruak ṭha kan neih loh avangin tun dinhmunah chuan a hrehawm rih a ni mai thei. Mahse, chumi avang chuan football match dang i chak leh zung zung thei tawh lo tihna a ni lo. Kan player-te hian hmaichhanah an theihna an lo lantir tawh ṭhin a, team angin kan ti thei a ni tih kan hria a ni," tiin a sawi zui bawk.