Manchester derby-a Manchester City striker Erling Haaland-a chakna goal khung chungchangah thutlukna dik lo (error of judgement) an siam tih referee lam enkawltu pawl Pro Ref (PGMOL lo ni ṭhin) chuan an pawm a, he thil thleng hi an enfiah zui tur thu an puang ta a ni.
Old Trafford-a Manchester United leh Manchester City inhmachhawnah hian, Josko Gvardiol-a ball cross per chu back post lamah kalin Haaland chuan City chakna goal hi a khung a. He hun lai hian United defender Lisandro Martinez chu Enzo Fernandez leh Haaland-a inkarah a ding a, mahse City midfielder Fernandez hian ball tauh tumin a taksa a theh phei a ni. Khelmuala official-te chuan he Chelsea midfielder hlui hian inkhelhah nghawng a nei lo (not interfering with play) tiin an ngai a, Patrick Dorgu-a boot chuan Haaland chu onside-ah a dah bawk niin an chhut a ni.
A tirah linesman chuan player 10-a khel City goal hi offside tiin flag a lo vai tawh a, mahse VAR chuan endikin referee Michael Oliver chu goal pawm turin a hrilh zui a ni. Mahse Pro Ref chuan thuchhuah siamin, VAR chuan Fernandez-a awmhmun khan inkhelhah nghawng a nei thei tih a hmuh hmaih a, referee Oliver chu khelmual sira monitor (on-field review) hmanga enfiah tura hrilh tur a nih thu an sawi ta a ni.
Pro Ref thupuangtu chuan: "Pathiannia Old Trafford-a Manchester United leh Manchester City inkhelh minute 60-naa thil thleng chungchangah Erling Haaland-a goal pawm a nih dan fiahna kan pe thei e. Khelmuala thutlukna hmasa chu Erling Haaland-a lakah offside a ni a, chu chu VAR-in a check hnuah onside a nih thu hmuh a ni. Chutih rualin Enzo Fernandez chuan ball a khawih lo tih finfiah a ni bawk a, mahse he hunah hian VAR chuan a awmhmunin nghawng a neih theih dan a chhut thiam lova, khelmualah ngei enfiah (on-field review) tura tih tur a ni zawk. Zanin hian Manchester United chu kan be tawh a, thutlukna dik lo a awm tih kan pawm a ni. He thil thleng hi enfiah zui a ni ang," tiin thuchhuah an siam a ni.
He thutlukna avang hian Sky Sports co-commentator Gary Neville pawh a bangbo hle a, "Offside dan hi min hrilhfiah nawn ka ngai dawn a nih hi, ka bo ta vek mai," tiin live-ah a sawi hial a ni.
United head coach Michael Carrick pawhin he thutlukna hi a ngaihtuahawm hle tih sawiin: "A buaithlak takzet a ni. Referee-te ṭanpui turin screen te leh office-a ṭhu referee te kan nei a, mahse football an hrilhfiah dan hi a ngaihtuahawm zawk a ni. Defender kiangah khatianga ball tauh tuma i inpalzuk lai siin inkhelhah nghawng nei lo anga ngaih a ni hi mak ka ti a, hriatthiam a har takzet a ni," tiin a sawi.
United defender Lisandro Martinez pawhin a thinur zia thup lovin, Fernandez-a'n goal khung a tum vanga a lam pana phei a nih thu leh chu vang taka Haaland chu zalen ta a nih thu a sawi a. "Offside a ni chiang alawm. Dan hi ka hrethiam lo a ni, ka hmaah a awm reng a, chuvang chuan a lamah ka phei a, Haaland a awm awl ta phah a ni. Mahni mualah derby kan hloh a, point thum kan hloh bawk a, inbengdaih a harsa hle mai. Season tin referee-te hian darkar khat leh a chanve chhung dan min rawn hrilhfiah ziah a, mahse Premier League-ah hetiang tihsual lian lutuk mi panga emaw parukin an ti hi chu pawm theih a ni lo," tiin a sawi bawk.
First-half-ah Bruno Fernandes a tihpalh avangin Phil Foden chu red card pek a ni a, City hi mi 10-in khel mah se Haaland-a goal hmang hian point 3 an hlawhchhuak ta tho a ni.
