Manchester derby-a Manchester City-in 1-0 a hnehna an chan ṭuma Erling Haaland-a goal khung pawm a nih dan chungchangah, Manchester United defender hlui Rio Ferdinand chuan a lungawilohna lantirin VAR thutlukna siam chu 'deluded' (rilru buai/ngaihdan mumal lo) tiin a sawisel hrep a. He goal chungchangah hian United lamin offside ngei tura an ngaih laiin, referee leh VAR lamin an pawmsak ta tho a ni.

He inkhelah hian linesman chuan a tirah mikhual lam City goal hi offside avanga hnawl turin a flag a lo phar hman a. A chhan chu Josko Gvardiol-a cross vawrh luh lai khan Enzo Fernandez chu offside dinhmuna awm chunga inkhel tibuai (interfered with play) anga lan vang a ni a, Fernandez hian ball tauh tumin a zuang hman nghe nghe bawk. Chutih rualin Manchester United defender Lisandro Martinez chu Fernandez leh Haaland-a inkarah a lo awm thung.

Mahse, match official-te chuan Chelsea midfielder hlui Fernandez hian offside dinhmuna awm chung siin inkhel a tibuai lo niin an ngai ta tlat a. Chu mai bakah, Patrick Dorgu-a ke phar chhuah avangin Haaland-a chu onside-ah a lo awm hlauh bawk nen, goal hi pawm a ni ta a ni.

Social media platform X lama a ngaihdan ziahlanah Ferdinand chuan VAR thutlukna chu nasa taka sawiselin, defender Lisandro Martinez-a chet dan pawh a sawisel tel bawk. Ferdinand chuan, "Martinez khan offside emaw offside lo emaw pawh nise goal hnaih bera awm kha a veng tur a ni. Second reilotê chhungin thutlukna i siam a ngai a, ani chuan Fernandez a va pan a, chutah Fernandez chuan ball khawih a lo tum zui bawk si. VAR lam hi an rilru a buai a nih hi! Engpawh nise, City player sawm chauhva an khelh hnuah pawh United khan chance an insiam tawk lo hrim hrim bawk a ni," tiin a tarlang.

Thutlukna siam a nih danah United head coach Michael Carrick pawh a thinrim hle a, match zawha a thusawiah referee-te leh VAR thutlukna chu mak a tih thu a sawi chhuak ve bawk. Carrick chuan, "Ka bo hle a ni, bo satliah pawh a tling lo zawk. Referee-te thutlukna pui turin khawl te, screen te leh office-a ṭhu referee-te thlengin dah an ni a. Mahse football inkhelh dan hetiang zawnga an hrilhfiah a nih chuan thil ngaihtuahawm tak a ni. Defender awm reng laia ball khawih tuma tlan chu attack nghawng lo leh inkhel tibuai lo angah an ngai a nih chuan ka tan chuan thil lungngaihthlak tak a ni. Thutlukna mak tak a ni a, an thil hrilhfiahna phei chuan thil a tichhe lehzual a ni.

"Inkhel a tibuai lo tih hrilhfiahna chu awihawm loh tawp a ni. Hei hian season pum chu thlak danglam dawn lo mah se, inkhel pui tham takah erawh nghawng lian tak a nei a ni. Season thui tak kan hmabak a, inkhelah hnehna kan chan leh vat a ngai a, chu chu keimahni mawhphurhna a ni. Vawiin thutlukna erawh kan thunun theih piah lam a ni thung," tiin a sawi bawk.

Enzo Maresca-a enkawl Manchester City hian first-half aṭanga player 10 chauhva khel chungin 1-0 in hnehna an chang a ni. First-half chhung khan City star Phil Foden chuan Bruno Fernandes-a laka tharum a thawh avangin red card hmuin hnawhchhuah a ni a. Fernandes-a'n leia a tluk laiin Foden-a chu a lo hlawi hmasa deuh nia a lan hnuah, thinrim takin Foden hian a ke pahnihin United captain dul hnuai lamah a lo chhuih zui avangin hnawhchhuah a tawk zui ta a ni.