Kar tawpa Manchester derby-a Manchester City an hmachhawn hmain, Manchester United chuan an captain Bruno Fernandes-a dinhmun ngaihtuahawm tak an hmachhawn mek a. Pathianni tlai dar 4:30 (BST)-ah United hian an elpui lian City chu Old Trafford-ah an mikhual ang.
Ningani zan Champions League inkhelah United hian Sabah chu 4-0 in an sawp a, Fernandes hian minute 90 chhung khel tluanin goal a khung bawk. Mahse inkhelh zawha Old Trafford a chhuahsan laiin he club captain hi a bai chho nia hmuh a ni a, inkhelh chhung erawhin hliam na lutuk tuar angin a lang lo thung.
Midfielder Fernandes-a'n minute 90 a khelh tluan chungchang sawiin, head coach Michael Carrick chuan, "Player inthlakna (subs) panga chiah kan nei a! Engtiang nge kan kalpui ang tihah thutlukna engemaw zat kan siam a ngai a ni. Amah pawh mi dang ang tho a ni a, match a khel hnem em em tawh reng a, mahse hetiang dinhmun phuhruk thei tur hian squad hi kan siam chho mek a ni. Zanin kha chu thutlukna siam ngai thil a nih avangin khelmualah a awm zui ta a ni," a ti.
Fernandes-a dinhmun hian United fan-te rilru a tihah hle a, weekend hmachhawn tur hian Old Trafford hliam enkawlna hmun lam chanchin thar pawh tarlan a ni bawk.
Luke Shaw
Left-back Shaw hi Everton laka an inkhelh ṭumin ke tha phiar (cramp) avangin hun tawp lamah lakchhuah a ni a, Ningani zan Champions League-a Sabah an hmachhawn ṭum khan chhawr zui lovin chawlh tir a ni. Carrick chuan, "Kan la en chhin a ngai ang. Zanin atan khan a dinhmun kan venpui deuh a ni. 100% a la inpeih chiah loh avangin kan chhawr lui lo a, ni hnih khat lo awm turah a dinhmun kan thlithlai dawn a ni," a ti. Shaw hi City laka mualneitu an nih hunah a inlan theih beisei a ni.
Carlos Baleba
Brighton aṭanga lakluh thar midfielder Baleba hian United tan debut a la siam lo. Carrick chuan, "A kerekah harsatna tlem a nei a, chawlhkar hnih emaw thum emaw vel a ngai maithei a, mahse kan la en ang. A hma aṭanga kan hriat sa a nih avangin buaina lian a ni lo. A lo kir leh vat theih chuan a ṭha hle ang, beiseina kan nei a, mahse hun tiam bik siam ka duh rih lo," tiin a sawi a, Fulham khualmual an pan hunah a inlan theih beisei a ni.
Matthijs de Ligt
Defender De Ligt-a dam ṭhat chhoh dan chungchangah Carrick chuan, "Thil a kal tluang hle mai. Training a nei ṭha em em a, mahse hun rei tak i chawlh hnuah chuan a tawp lamah fimkhur taka enkawl zui a ngai ṭhin. Ke pen leh tur chuan balance neih a pawimawh a, kawng dik a zawh mek a, kan zinga a awm leh thei hi a lawmawm hle a ni," a ti.
Amad Diallo & Manuel Ugarte
Amad Diallo chu tun karah a inlan thei dawn lo tih leh hun rei deuh a la chawlh a ngaih tur thu Carrick chuan a lo tarlang tawh bawk. Chutih rualin Manuel Ugarte erawh Uruguay aiawha World Cup a khelhna lama a khup hliam zai a nih hnuin a dam chhoh theih nan inenkawlna (rehab) a ṭan mek a, club medical staff-te'n uluk takin an enkawl mek a ni.
