Manchester United head coach Michael Carrick chuan naktuk hian Elland Road-ah Leeds United an hmachhawn dawn a, kar kalta chhunga boruak buai tak pal tlang mektu United tan hian chak ngei ngei a pawimawh hle ta a ni. Red Devils hian inelna hrang hrangah thla khat chuang zet hnehna an chang tawh lo a, khualmualah fiahna khirh tak an hmachhawn dawn a ni.
United buaina hi khelmual chhung maiah a tawp lo. An academy chhuak theihna ngah tak JJ Gabriel chuan senior team tana inelna tak taka a inlan hmain club chhuahsan a tum niin a lang a, tun season-a inkhelhna hmun a chan tlem lutuk avanga a lungawi lohna chuan chhuah duhnaah a hruai thleng a ni.
Carrick-a naute hi Premier League-ah 13-na dinhmunah an awm mek a, an khingpui tur Leeds aiin point thumin an hniam a, hmun rukin an inthlau bawk. Naktuk inkhel dangte a zira team hniam zawkte an chet ṭhat phei chuan, Elland Road-a an inkhelh hmain United hi dinhmun hlauhawmah an ding hman hial maithei a ni. Thawhlehnia Champions League-a Atletico Madrid laka an tlawm zui bawk nen, Old Trafford chhungril boruak chu a rit chho hle.
Everton chief executive hlui Keith Wyness chuan JJ Gabriel-a chhuah tumna laka Manchester United-in dan anga hmalak (legal action) an rilruk nia sawi chu mak a tih thu a sawichhuak a ni. Kum 16 mi Gabriel hian a registration tihtawp sak turin club hotute a ngen a, United hian remti chiah lo mah se Europe khawmualpui lam pan chu a thlan zawk hmel hle.
Football Insider hnenah Wyness chuan, "United-a a cham zui theihna chance hi zaa 30 vel chauh a nih laiin, Real Madrid pan theihna chance hi zaa 70 lai a ni thung. Chutiang khawp chuan an lamah thil a awn tawh a ni," a ti. Wyness chuan sawi zawmin, "Thu tam tak sawi a ni tawh a, thil a kal thui tawh hle. Man United hian chet an la dik lo a, nikum kha hma lak hun dik tak chu a ni zawk. A hlawhtlin theihna tur leh inkhelh a chan theih dan tur ruahmanna chiang tawk Gabriel hi an pe lo a ni," a ti bawk.
Dan anga chhui an tum nia sawi chu sawisel zuiin, "Rawlthar tam tak lo chherchhuak tawhin an ṭhanlen dan hrang hrang ka lo hmu tawh ṭhin a. United-in court lama kalpui an tum a nih ngat chuan a awmang lo hle a, kawng dik lo tak an zawh a ni ang," tiin a sawi.
Hemi rual hian United chuan Thawhlehnia Spain-a an tlawm hnua an club transfer kalpui dan sawiseltu Lisandro Martinez chu pawisa an chawitir ve bawk a ni. He Argentina centre-back hian nipui laia player an lakluh danin Champions League khelh theihna a chhawm nung tawk lo niin a sawi chhuak a nih kha.
Martinez hian a thusawi avang hian ngaihdam a dil ve leh ta a, social media lamah thuchhuah siamin, "Vawiin khan club hruaitute leh manager nen kan inhmu a. Inbiakna ṭha tak niin, Thawhlehni zan inkhelh hnua thil thlengte kha tlang takin kan sawidun a ni," a ti. Argentina defender chuan chhunzawmin, "Mi zawng zawngin football hi thinlung tak leh phur takin ka khel ṭhin tih an hria. Hneh lohna kan tawh avanga ka thinrimna khan hmun leh hun lo takah ka rilru min phawrhchhuah tir a, chumi avang chuan ngaihdam ka dil duh a ni," tiin a sawi.
