Manchester United squad chuan head coach Michael Carrick chu an thlawp tlat a, Lisandro Martinez-a'n kum 45 mi Carrick-a a ṭanpuina thu a sawi chhuah chu player-te'n an pawm hle. Martinez-a thusawi zawng zawng chu player zawng zawngin thlawp vek lo mah se, sawiselna Carrick-a laka la peng a, club board lam hawitir a tumna chu thil ṭha tak anga ngaih a ni.
Atletico Madrid laka an tlawm ṭum khan United hian khelh ṭhat lam an pan a, match 9 an khelh tawha vawi hnih chauh hnehna an la chang chung pawhin, Carrick-a chunga nawrna awm mek karah player-te chuan an coach hi an la ṭan tlat a ni. Senior player eng emaw zat chuan Martinez-a ngaihdan ṭawmpuiin, kumin nipui khan head coach hian a phu ang tawk ṭanpuina a dawng lo tih an ring a, hei hi Carrick-a ṭhian hnaih tak takte pawhin an ngaihdan a ni bawk.
Hei hian Carrick-a hmabak relna kawngah chief executive Omar Berrada leh director of football Jason Wilcox te chungah pressure a siam lian hle. Tun dinhmunah inthlakthlengna siam an tum tih hriat la ni lo mah se, player-te chuan tun kar chhung hian an ngaihdan an tilang chiang tawh a ni. Zirtawpni khan Carrick chuan training session chu a ṭha ber tum a nih thu leh he buaina hian squad a phuarkhawm (galvanised) zawk thu sawiin, player-te'n an thlawp zia a tarlang nawn leh a ni.
Thawhleh zanah Wilcox leh club board te a beih chiam hnuah, Martinez hi season tharah Old Trafford-a a cham a rinawm tawh loh hle. A contract neih lai hi tun season tawpah a tawp dawn a, kum khat dang pawhsei theihna clause awm mah se United hian an la hmang lo. Martinez hian Old Trafford chhuahsan a duh thu a tichiang tawh a, United pawhin a hma aṭang tawhin hmalak dan tur an lo ngaihtuah lawk tawh bawk a ni. A khelh dan a tlakhniam bakah hliamin a tibuai zing hle.
Nipui tharah United hian ke veilam hmang centre-back thar an zawng dawn a, Everton defender Jarrad Branthwaite chu an lak tumte zingah a awm leh tawh a ni. Martinez-a'n chona thar a duh a, United lamin a thlaktu tur hun rei tak daih an zawn bawk si avangin, kum 2027-a inṭhen chu a tu ve ve tan pawh thil ṭha ber a ni thei ang.
Wilcox-a'n United tana a ruahmanna chungchang mipui hmaa a sawi hnuhnun ber aṭangin kum khat a tling ṭep tawh a. Khatih lai khan Ruben Amorim-a hnuaiah match thum an zawnin an chak a, MUTV-ah interview a nei a nih kha. Hemi hnu hian Amorim-a ban a nihna kawngah a inrawlh a, player-te lungawi lohna siamtu transfer window-ah pawh sum hman a tam loh avangin sawisel a tawk nasa hle. Manchester City academy hotu a nih lai khan chanchinbumite hmaah Wilcox hi a inhawng viau ṭhin a, Berrada pawh City a awm laiin biak awlsam tak a ni ṭhin; mahse United an zawm hnuah chuan an ngawi zui hmak a ni.
Hetiang buaina karah hian Amazon chuan hlawkna an tel nasa hle. 2026/27 campaign chhung documentary siam nan £10million chuang an sen hnuah, Thawhlehnia Martinez-a interview chuan X (Twitter) ringawtah vawi maktaduah 19 chuang en a hlawh der tawh a ni. He interview, Martinez-a'n "Kan technical director hnen aṭang hian beisei ka nei sang zawk a ni" tia a hotute a khawng taka a sawiselna hi United chanchina thil thleng ropui leh hriatreng hlawh zinga mi a ni hial ang.
Champions League-a Como luhchhuah tura an zin hunah United chu Milan bul hnaiah an thleng dawn a ni. Serie A club hian an khelmual Giuseppe Sinigaglia Stadium (seat 12,000 lenna)-ah inkhelh phalna UEFA hnen aṭangin hmu mah se, dil kam bul hnaiah khualbuaizawl ṭha an indaih loh avangin darkar khat vela hla Milan khawpui thlan a ngai ta a ni.
