Kum 2026/27 Champions League inelna chu puitling taka ṭan a ni ta a, inelnaa tel team zawng zawngte pawhin an match hmasa ber an khel kim ta vek a ni. Manchester United chuan mahni mual Old Trafford-ah Sabah FK chu 4-0 ngawta sawpin bul an ṭan ṭha hle a. He hnehna ropui tak avang hian Red Devils te chu league phase-ah pathumna dinhmunah an inhlangkai nghal a, mahse Michael Carrick-a naute hian hma lamah khingpui khirhkhan zawk match sarih dang an la hmachhawn dawn chauh a ni.
He inkhelah hian goal khungtute'n fak an hlawh hle rualin, United tan chuan an player panga ngawt maiin an career-a vawi khat nan Champions League match hmasaber (debut) an khelh ve theihna zan a nih bawk avangin chhinchhiah tlak tak a ni. Old Trafford-a punkhawm United ṭantute tan pawh kum thum hnuah a vawikhat nan Champions League hla (anthem) an ngaithla nawn leh a, zan ropui leh chhinchhiah tlak tak a tling a ni.
Sabah laka 4-0 a an chak ṭum hian Senne Lammens, Bryan Mbeumo, Patrick Dorgu, Shea Lacey leh Harry Amass te chuan Champions League-ah debut an nei a. Heng player panga zinga pali - Mbeumo, Dorgu, Lacey leh Amass te chuan Europe inelna sang bera an vawi khat inlan theihna chungchangah hian social media kaltlangin an rilru phurna an phawrhchhuak nghal hlawm a ni.
Mbeumo chuan, "Great first step in UCL and Old Trafford! Amazing atmosphere! Thank you again," (UCL leh Old Trafford-a ke pen hmasaber ropui tak a ni! Mual chhung boruak a va ropui em! In chungah ka lawm nawn leh e) tiin a tarlang.
Bul ṭantu Dorgu pawhin Instagram-ah thlalak hrang hrang a tarlang a, Man of the Match lawmman a chawi lai thlalak telin: "First Champions League game. All glory to God," (Champions League match hmasa ber. Pathian hnenah ropuina zawng zawng awm rawh se) tiin a ziak bawk a ni. Dorgu hi left-back-ah a che ṭha hle a, Luke Shaw-a chona hautak tak a pe thei dawn em tih chu thlir zui tlak a ni ang.
Bench aṭanga rawn lut a left-back-a Champions League debut rawn siamtu rawlthar Harry Amass pawhin Instagram lamah: "UCL debut last night. Amazing feeling, a great win," (Nizan khan UCL debut ka nei ta. Hlimawm tak a ni, hnehna ropui tak kan chang bawk) tiin a tarlang ve bawk a ni.
A tawp berah rawlthar theihna ngah tak Shea Lacey pawhin Instagram story-ah: "Special night," (Zan danglam bik tak a ni) tiin a phurna a phawrh ve bawk. Hemi a nih avang hian goalkeeper Senne Lammens chiah hi United debutant zingah social media lamah he an hnehna chungchang la tarlang lo awmchhun a ni ta a ni.
Mikhual lam Sabah FK tan erawh qualifying round chhiar tel lovin, Champions League main-stage a an vawi khat inlan hmasak ber a ni a. Old Trafford-ah hian an player zinga 16 laiin Champions League debut an rawn nei a ni. An club ṭantu mi 600 vel hmaah 4-0 a tlawm mah se, Old Trafford tualzawla Champions League match ropui an khel thei kha chu an theihnghilh tawh ngai loh tur thil a ni ngei ang.
