Ningani zan Champions League inkhelah Manchester United chuan Old Trafford-ah 4-0 ngawta Azerbaijan champion Sabah FK sawpin hnehna ropui tak an sual chhuak a. He inkhel zawha fan-ten player che ṭha ber an thlannaah England midfielder Kobbie Mainoo chu vote hmu hnem ber niin Man of the Match atan an thlang chhuak a ni.
He inkhelah hian United hian first-half chhung ringawtin goal thum an thun hman a. Matheus Cunha, Bruno Fernandes leh Benjamin Sesko te chuan goal khungin chawlhlawk hmain 3-0 in hma an hruaipui a ni. Second-half lamah tualchhung club Sabah lakah point thum an hmuh chian tawh hnuin, Argentina defender Lisandro Martinez chuan goal khat rawn thun belhin 4-0 in inkhel an titawp ta a ni.
Michael Carrick-a naute tan tun season Champions League match an khelh tawh zinga awlsam ber nia ngaih theih inkhel a zawh hnu hian, 'Talking Points' app kaltlangin United ṭantute chuan he inkhela che ṭha ber tur thlangin vote an thlak a. Vote tla zawng zawng aṭangin kum 21 mi Kobbie Mainoo chuan za zela 48 chuang (over 48%) zet hmuin pakhatna dinhmun a hauh chiang hle a ni.
He England international hian mual laili a thunun hneh em em a, a khelhpui Youri Tielemans nen midfield an thunun hneh hle. Bruno Fernandes-a goal khung tur siamsaktu Tielemans pawh hian vote tla aṭangin za zela 11.18 ngawt hmuin pahnihna dinhmun a luah ve bawk a ni.
App chhunga fan-te ngaihdan ziah luhna (comments section)-ah pawh Mainoo-a theihna chu an fak hlawm hle a. Fan pakhat chuan, "Kobbie kha player ṭha ber a ni a, a ball pass a felfaiin a hmu zau em em a, hmun awl a hmang thiam hle bawk," tiin a ziak a. Fan dang pakhat pawhin, "Tielemans kha first-half chhungin a che ṭha em em a, mahse Mainoo erawh inkhelh pumhlum chhungin a khel ṭha tluan zak a ni," tiin a ngaihdan a tarlang.
Midfield pahnihte bakah hian goal khungtu Benjamin Sesko, substitute aṭanga rawn lut Joshua Zirkzee leh tlarhnung defender Leny Yoro te khelh dan pawh fak a hlawh hle a. Fan pakhat chuan Sesko-a thawhrim dan chu fakawm a tih thu sawiin, Pathiannia Manchester derby match an hmachhawn hunah pawh hetiang hian khel leh se a duh thu a sawi bawk.
Mainoo hian Champions League inelnaah match 3 chauh la khel mah se, puitling takin a khel chhuak thei a ni. Europe inelnaa a tawn hriat neih tam zawk hi chu Europa League lam a ni a; kum 2024-a United-in final an thlen ṭum khan he inelnaah hian match 8 lai a lo khel tawh a ni.
Champions League-ah hian 2023-24 season khan vawi hnih a inlan tawh bawk a. Chuvangin Ningani zana Sabah FK laka a khelh kha he inelna sang bera a match thumna chiah a la ni a, heti chung hian mual laili thunun hnehin Man of the Match lawmman a dawng zui ta tho a ni.
