Manchester United defender Harry Maguire chuan tun dinhmuna khawvel football-ah boruaka ball tauh (header) thiam ber chu a khelhpui hlui Casemiro a nih thu a sawi chhuak.

Casemiro hian 2025-26 Premier League campaign tawpah khan Old Trafford-a a hun a hmang zo a, kumin nipui khan United nena an contract a zawh hnuah man chawi lovin (free agent) a chhuak ta a nih kha. Kum 34 mi Brazil midfielder hian Ruben Amorim leh Michael Carrick-a te hnuaiah United-a a hun tawp lam kha a hmang ṭha hle a ni.

Kumin nipuia Brazil tana World Cup khel ve bawk Casemiro hian, season liam ta khan United tan inelna hrang hrangah match 35 inlanin goal 9 a khung a, midang pet luh tur vawi hnih a siamsak (assist) bawk. Real Madrid leh Manchester United star hlui hian July thla khan Major League Soccer (MLS) club Inter Miami chu a zawm fel ta a ni.

Inter Miami star hian season liam ta khan United captain Bruno Fernandes nen inkawp fuh chho hlein, boruaka ball kang chungchangah United tan theihna sang tak a lantir ṭhin a, khawvel huapa ball tauh thiam ber pawl a nih zia a pholang fo a ni.

Boruaka ball tauh thiam leh tha nei ṭha tia hriat lar Maguire pawh hian a teammate hlui Casemiro-a theihna hi a ngaisang hle a, boruaka ball khawih leh tauh kawngah chuan khawvelah amah tluk an awm lo nia a ngaih thu a sawi.

Viaplay nena an inkawmnaah, kum 33 mi United captain hlui Maguire hi tun dinhmuna football khawvela ball tauh thiam ber tunge ni tih an zawt a. Cristiano Ronaldo ang chi player ropui te chu kalsanin, he English defender hian, "Casemiro," tiin tawi tein a chhang a ni.

Khawvela ball tauh thiam ber atana Cristiano Ronaldo thlang lo mah se, he zawhna leh chhanna tawi (Q&A clip) ah hian Maguire chuan a khelhpui hlui Ronaldo hi a theihnghilh bik lo.

Old Trafford-a a awm chhunga a khelhpui tawh zinga player ṭha ber tunge ni tih an zawh thung chuan, Maguire hian United legend Ronaldo chu a ṭha ber a nih thu leh tuman an tluk loh thu a sawi chiang hle.

Tunah hian Saudi Pro League club Al-Nassr tana khel mek Ronaldo hian kum 2021 khan Juventus aṭangin United-ah a vawihnih nan a kir leh a, kum 2022 thleng khan Old Trafford-ah hun a hmang a nih kha.