Manchester Derby inkhela Erling Haaland-a'n chakna goal a khung laia referee leh VAR tihsual lian tham tak thleng chu a fiah em avangin, inkhelh zawh hnu darkar tlemteah Manchester United hnenah ngaihdam dilna official thuchhuah thehluh nghal a ni a. Hemi hnu hian VAR hi hman tawh lohva tihtawp hlen hial phutna aw a chhuak zui bawk a ni.
Mipui leh chanchinbumite lam aṭanga nawrna a san chhoh zel tak avangin, referee hotu lu Howard Webb chu he tihsual lian tak hi mipui hmaa rawn sawifiah turin a rawn inlar a.
Mahse Webb-a thil rawn sawi hian mi a hmin zo lo hle a; Dermot Gallagher-a'n VAR chief leh a assistant te chuan 'an focus an hloh' tia a lo sawi tawh chu a rawn sawi nawn leh mai a ni a. Heng referee pahnihte hi an mawhphurhna aṭangin chawlhtir (stood down) an ni zui tawh bawk.
Webb chuan, "He thil thleng avang hian ka beidawng takzet a ni. Kan zain kan beidawng vek a, a bikin khelmuala official-te ngei pawh an beidawng lehzual. An hnaah hian chapona nei ṭheuh an ni a, hetiang dinhmuna an tlin ta lo chu an rilru a na takzet a ni," tiin a sawi.
Webb-a sawi danin, official-te hian Enzo Fernandez-a'n ball a tawk nge tawk lo tih chauh an lo ngaihtuah thuk lutuk ('tunnel vision') a, chutih laiin inkhelh kal zelah a inrawlh (interfering with play) em tih erawh an lo ngaihtuah hmaih ta a ni. Fernandez hi chiang takin offside dinhmunah a ding a, United goalkeeper Senne Lammens leh defender Lisandro Martinez te a lo tibuai hle a nih kha.
Howard Webb-a insawifiahna hian sawiselna nasa tak a hring chhuak a, VAR leh a khawihtu official-te laka lungawilohna a tipung zual hle. The Telegraph chanchinbu mi Dominic King chuan X-ah ziakin: "Haaland-a goal chungchanga Howard Webb-a 'insawifiahna' hi thil tenawm a ni... VAR room-a awmte mawhphurhna phurhtir ringawt chu a awlsam hle a, mahse football dante chu an thlak ngun lutuk a, eng nge thleng mek tih pawh tuman an hre tawh lo a ni. Football hi an tichhe vek tawh," tiin a tarlang.
The Mail chanchinbu mi Ian Ladyman chuan sawi belhin, "Howard Webb hi a ṭawng tam lutuk tih hi ka ngaihdan nghet tak a ni a, hun rei tak a ni tawh bawk. Tihsualte replay chiam chiam a, a te ber thlenga sawi nawn sek hi rilru ṭha pu chunga tih ni mah se tu tan mah ṭangkaina a nei lo. A ṭangkai awmchhun chu VAR booth-ah thutlukna leh kalphung ṭha zawk neih hi a ni a. A dang zawng chu bengchheng mai a ni," tiin a sawi bawk.
Richard Keys pawhin na takin a sawisel a: "Old Trafford-a tihsual lian tak thleng kha Howard Webb chuan 'tunnel vision' vang a nih thu a sawi a. Chu chu eng nge a awmzia ni reng reng? Inkaichhawn theih em ni? Midang pawhin an nei ve em ni? Awmze nei lo lutuk a ni. Hei chu thiam tawk loh vang liau liau a ni. Webb-a'n mawhphurhna a lak aṭang hian refereeing hi engmah hmasawnna a la awm lo. Inthlak a hun tawh a nih hi," tiin a kap zui hle.
Henry Winter pawhin Webb hian Michael Owen nena insawifiahna inpuahchah lawk sa thehchhuah mai lova, a hnaah mawhphurhna fel tak a lak a ngai a ni tih a tarlang tel bawk.
Tun karah hian Manchester United chuan Old Trafford-ah Carabao Cup match-ah Brighton an mikhual dawn a, inelna dan ang hian VAR hman a ni dawn rih lo a ni. Carabao Cup-ah hian semi-final stage aṭang chauhvin VAR hi hman ṭan a ni ṭhin a ni.
